Alejandro Muyale. Foto: Ariën Rasmijn

Alejandro Muyale – foto: Ariën Rasmijn

ORANJESTAD —Tiara Air a haya surseance for di Corte na Aruba. Motibo pa esaki ta cu e compania di aviacion solamente a haya un parti di e suma di alrededor di 30 miyon di dollar di entrada cu mester bin via gobierno Venezolano pa nan.

Scucha e declaracion di Alejandro Muyale, director di Tiara Air

E surseance di tres luna lo duna Tiara Air espacio pa por reorganisa y pone enfasis ariba otro rutanan pa asina haya un entrada mas stabil, segun Alejandro Muyale, director di e compania di aviacion. Durante un conferencia di prensa awemainta ela declara cu e surceance cu Corte a duna lo protehe e compania y su empleadonan mientras cu Tiara ta sigui negocia cu Venezuela y ta pone mas vuelo pa otro rutanan.

 
Gobierno Venezolano y Tiara Air a palabra na november ultimo cu un serie di pago lo bay tuma lugar pa asina e compania haya su placa. 80 porciento di e entrada di Tiara Air ta bin for di Venezuela, pero te aworaki solamente un pago a wordo hasi. Ademas, autoridadnan Venezolano a ofrece Tiara Air y otro companianan cu ta bula pa nan pais pa nan wordo paga na combustibel en bes di placa cash. Muyale ta mira esaki como un opcion, aunke cu e ta keda prefera haya pago den sumanan di placa.

 
Outor: Ariën Rasmijn