ORANJESTAD — Gobierno di Aruba a manda un carta pa Global Financial Integrity (GFI) pa pidi aclaracion di e cifranan cu nan a publica ariba fluhonan di placa ilicito via e isla.
Segun prome minister Mike Eman (AVP) ni Meldpunt Ongebruikelijke Transacties (MOT) of Banco Central di Aruba por reconoce nan mes den e cifranan cu ta indica cu entre 2002 y 2011 25 biyon dollar na placa ilicito a pasa via Aruba.
Ariën Rasmijn den entrevista cu prome minister Eman
Minister di Finanzas Juan David Yrausquin (AVP) ta bisa Red Caribense cu e estimacion di GFI cu e sumanan anual di fluho ilicito di placa ta igual na 100 porciento di Aruba su GPD ta hopi improbabel. Siman pasa e mandatario a duna di conose caba cu ela laga MOT hasi un quickscan di su organisacion y a pidi otro instancianan manera Departamento di Impuesto (SIAD) y Aduana pa duna nan comentario.
FATF y tax holidays
Prome minister Mike Eman (AVP) di su banda ta bisa cu ambos MOT y Banco Central di Aruba (CBA) ta declara cu nan no ta reconoce nan mes den e cifranan aki. Nan a duna gobierno e conseho pa manda e carta pa GFI. A base di e splicacion di GFI ariba e cifranan, Gobierno lo por controla si e ponencia di e instituto ta basa ariba berdad. E prome mandatario ta enfatisa serca Red Caribense cu net den ultimo añanan Aruba a pone control mas estricto ariba fluhonan di placa pa asina sali for di lista negativo di Financial Action Task Force (FATF).
Companianan ta keha mas tanto pasobra e reglanan cu ta cumpli cu FATF ta asina asina pisa, asina Eman ta splica. Pa por cumpli cu FATF, Banco Central ta controla banconan y ta traha manual. Aworaki tin tres ley nobo serca Raad van Advies (RvA), cu segun Eman lo hasi control ariba fluho di placa na Aruba ainda mas skerpi. E prome mandatario kier sa si acaso GFI a tuma cuenta por ehempel cu e hecho cu hotelnan y companianan petrolero pa hopi aña a disfruta di un asina yama tax holiday, den cual nan no tabata paga belasting. Por ta e sumanan ey lo por a wordo hiba den e calculacion di GFI pa asina yega na sumanan asina halto, segun Eman.
Estimado
Fin di aña GFI a presenta nan rapport ariba fluhonan ilicito di placa rond mundo. Den rapport aki a duna un ranking di 144 paisnan den desaroyo na unda placa gana cu crimen, corupcion y falta di paga belasting ta pasa di man pa man. De e lista aki Aruba a cay na di 31 luga. China, Rusia y Mexico ta e paisnan na unda mas placa a move ilicitamente na mundo. E economista Dev Kar, autor di e rapport, mes a duna di conoce cu e cifranan ta basa ariba estimadonan. De caso di Aruba esaki ta particularmente e caso segun Kar, pasobra instancianan den e pais mes no kier duna mucho informacion.
Fluho di placa ilicito ta creciendo anualmente, causando daño na economianan di paisnan den desaroyo, pasobra e placa aki ta wordo kita for di e economianan di e paisnan aki. Entrada di belasting ta bay perdi, por ehempel, causando cu na final un pais mester presta mas of ta haya su mes ricibiendo mas ayudo di desaroyo.
Outor: Ariën Rasmijn