Sushi no tapá na Landfill Malpais - foto: Kokomo Beach

Sushi no tapá na Landfill Malpais – foto: Kokomo Beach

VAERSENBAAI – “Muskita ta ataká turista i regularmente mester sera kushina”, e doño di Kokomo Beach Toin van de Mosselaar ta bisa. Segun Van de Mosselaar e infestashon di muskita a surgi pasobra tin simannan largu kaba ko no ta tapa e sushi na Landfill Malpais i pesei el a entamá un kaso sumario kontra Selikor.

 
A keda sin tapa e sushi na Malpais pasobra e ekipo di trabou pa hasi esaki ta dañá. Operations Manager na Selikor John Cijntje ta lamentá e situashon. “Selikor ta trahando duru pa solushoná e problema. Ta dura un poko prome ku nos alkansa e retraso.”

 
Kuminsamentu di desèmber Van de Mosselaar a ripará ku e kantidat di muskita banda di e playa a oumentá ekstremamente. El a bai investigá i a sali na Landfill Malpais. “Loke m’a topa kuné einan tabata masha fis mes: areanan grandi di sushi habri sin tapa, bestia morto ku bichi i hopi sushi ku tabata putri.” Van de Mosselaar dia 17 di desèmber a aserká Selikor ku un ‘yamada di emergensia’. “E situashon ta insoportabel, mester tuma medida awor”, Van de Mosselaar a skibi den su e-mail pa e kompania di prosesá sushi.

 
No a mehorá
Selikor a laga Van de Mosselaar sa ku e mashinnan ta daña i ku e situashon en berdat ta bergonsoso. “Mei mei di otro siman nos ta ferwagt di tin un situashon normal atrobe na Landfill.” Esaki ya ta mas ku dos siman pasá i segun Van de Mosselaar no por ripará nada di e mehorashon aki.

 
“M’a bai wak na Malpais tur dia. Dia pa dia e situashon ta bira pió. Selikor ta atmití esaki, pero nan no por hasi nada pasobra no tin material disponibel pa tapa. E infestashon di moska aki ta pone ku nos mester sera nos kushina i e ta kore ku turista. Esaki ta kosta nos 5 mil na benta pa dia!”, Van de Mosselaar ta lamentá.

 
Superá retraso
Cijntje ta na altura di e situashon i ta bisa ku entretantu ta tapando e sushi segun e prosedura normal. “Ta tapa e sushi nobo i entretantu nos ta superando e retraso. Nos ta ferwagt ku otro siman tur kos ta kore manera debe ser.”

 
Cijntje no sa eksaktamente ki dia e material pa tapa e sushi a kai afó, pero ta bisa ku Selikor tin sigur dos siman ta trata di solushoná un situashon ‘desafortuná’. “Prome i di dos dia di Pasku, aña nobo i tur wikènt: no tabatin un dia ku nos no tabata riba dje. Anto enfermedat pa motibu di esaki? Mi no ke bai asina leu.”

 
Kaso sumario
Van de Mosselaar a entregá un petishon pa un kaso sumario na korte; ainda e no ta mira mehorashon na Landfill. Aktualmente no ta e plaka ta mas importante p’e: “Mi ke pa nan limpia e lugá.” Cijntje ta reakshoná sorpresá riba e petishon pa un kaso sumario. “Manera semper, for di prinsipio nos tabatin kontakto ku Kokomo Beach i e habitantenan den besindario. Si tin algu ta sosodé nos ta habrí i asta nos ta tuma inisiativa pa avisá hende. Semper e relashon aki tabata bon. Ke men mi no sa nada di un kaso sumario.”

 
Outor: Elisa Koek