Tres partido di karta sin trabou: Saimond Janga, Marthildo Thielman i Glenn Bernabela – foto: Belkis Osepa
KRALENDIJK – E kalidatnan ku e diestres trahadónan di pòstkantor na Boneiru tin konhuntamente ta haltu. Chèns ta grandi ku nan lo no drenta den servisio dje kompania di pòst nobo Flamingo Express Dutch Caribbean.
Ya e kompania a a habri solisitut pa buska trahadó nobo. E grupo di diestres ta ainda den servisio di Nieuwe Post NV (NPNV), ku no a duna nan retiru i no a kaba regla nan benefisionan finansiero ku nan tin derecho riba dje.
Volúmen
Saimond Janga (30 aña) ta traha kasi 17 aña pa NPNV. For di komienso dje aña aki e ta yena su dia ku kosnan di hasi na kas i topa ku su koleganan huntu ku nan sindikato Abvo. Djamars el a kore e ruta ku e ta hasi diariamente pa parti pòst na Belnem, Tera Kòrá i Nikiboko. Pa dia e ta repartí 1250 karta bai ariba. Dia ku tin hopi volúmen e kantidat ta subi te 3800.
Koriendo riba EEG Boulevard den direkshon di Belnem, Janga ta konta di su eksperensha komo partidó di karta. “Mi gusta mi trabou. Únabes bo kustumbrá kuné i kohe su swai, e trabou ta dushi. Mi ta plania mi trabou bon. Sali mainta na tempu pa mi no kai lat ku partimentu di karta.”
Arte
Janga no ta wòri ku ta buska otro partidó di karta. “Traha na pòstkantor ta un arte. No ta ken ku ta por traha na un pòstkantor. Hopi gai di mi edat òf mas yòn ku mi ta bisa: ‘dushi trabou bo tin, kore den outo henter dia’. Tur ku a bin a bai. No ta kuestion di drenta outo só i kore. Bo mester hasi bo sortering adelantá, wak kon bo ta tira e karta, tene kuenta ku kaya i kasnan nobo i wak bon kon bo ta kore bo ruta pa haña e brievenbus na bo banda. Ademas bo mester tene kuenta ku tempu i wak tráfiko.”
E trabou di partidó di karta tin su difikultatnan kuné. Asina mester tene kuenta ku tráfiko i velosidat, pasobra banda di ta partidó di karta nan ta tambe shofur. Pero tambe kachó ta forma un peliger pa e ramo di trabou aki. Koriendo den e bario Lima un kachó a bula kurá dilanti outo, kasi pa kousa un aksidente.
Kalidat
Marthildo (Bòi) Thielman (48 aña) a stür outo, repasando trayekto na Belnem ku Janga ta kore diariamente. Thielman a traha 30 aña na pòst. Delaster añanan paden surtiendo pòst, chèk proseso di pakete i kartanan i hasi kòntròl. Pa añanan largu e tambe a kore ruta pa repartí parta.
Thielman: “Awor ku nos lo no hasi e trabou mas hopi kalidat ta bai pèrdí. Nos por traha ku bèinam di hende i ku nòmber di kariño. Si un karta bin ku un bèinam mi sa un bes ta pa ken. Mi ta bisa e brievenbesteller ta ken. Sa sosodé tambe ku un karta ta bin sin number di kas den Antriol. Mi ta bedèi e partidó di karta pa ken e karta ta i na kua kas nan mester ta. Tin bes karta ta bin asta ku adrès bieu i nos sa e adrès nobo dje persona.”
Korte
Trabou ta stanká awor na Pòst kantor. Tin sigur 15 mil karta i tambe un gran kantidat di flyer pa repartí. E trahadónan ta lamentá kon henter e kambio di un kompania pa otro a bai. Aña pasá nan a tende ku nan lo no pèrdè nan trabou. Tambe ku nan lo haña tur pago relashoná ku e añanan den servisio. Janga: “Lástimamente a bisa nos ku boka i nos no tiné pretu riba blanku, sino nos lo a bai korte ku nan.”
Outor: Belkis Osepa