Fiskal Henry Hambeukers – potrèt: Belkis Osepa
KRALENDIJK – Ministerio Públiko (OM) di Boneiru a entregá un petishon pa apelashon den e kaso Zambezi na Korte Komun kaba, promé ku e tratamentu tokante e kontenido a tuma lugá.
Esaki ta posibel a base di hurisprudensia, fiskal Henry Hambeukers ta bisa. E tratamentu di e kaso Zambezi, kaminda èks diputado di UPB Burney El Hage i èks lider polítiko di UPB Ramoncito Booi ta parse dilanti wes, ta tuma lugá na mart.
Na prinsipio OM lo a pasa pa apelashon despues di e sentensia. OM no ta di akuerdo ku e desishon di wes Irma Lips pa no inkluí e aktonan di korupshon di kua tambe ta sospechá El Hage i Booi.
Hurídiko
OM ta pensa ku e desishon di Lips ta su desishon final. Hambeukers: “Nos a palabrá e kaso internamente i huridikamenta nos a investig’é bon. A base di hurisprudensia nos ta pensa ku den kaso di un veredikto final, nos por apelá.
Awor Korte Komun mester studia e petishon di OM. Segun OM no por lòs e echonan ku awor ta pèrsiguí El Hage ku Booi p’e, esta froude di hipotek i labamentu di plaka, for di korupshon.
Rechaso
Si Korte rechasá e petishon di OM, e kaso penal ta sigui normal na mart. OM lo trese e aktonan di korupshon ku a skrap dilanti mas despues. “E ora ei nos ta warda mira kon e kaso lo kaba. Den e huisio final mester tin pará ku nos no a haña permit pa pèrsiguí e korupshon. Djei nos ta bolbe apelá i bon mirá asina nos tin dos chèns”, segun Hambeukers.
Outor Belkis Osepa