Desiree Croes – Potrèt: Belkis Osepa
KRALENDIJK – Mester manehá e problema di abusu di mucha i maltrato di mucha na Boneiru na un manera adekuá. Esaki Desiree Croes, presidente di Fundashon Respetá Mucha, ta haña. “Loke ku nos ta mira sosodé riba e isla ta djis un parti chikí di e totalidat di e problema.”
E siman aki un mama di 41 aña a parse dilante korte di Boneiru komo sospechoso den un kaso grandi di delitu kontra moral. Ta akus’é di a laga su dos yunan menor di edat kometé prostitushon den e temporada di 2007 te 2011.
E mama tabata laga nan bai ku diferente hòmber pa plaka, karchi’ telefon òf hoya. Su mes kasá tambe lo a abusá seksualmente di e mucha muhénan. Segun fiskal Henry Hambeukers tin indikashon fuerte ku tabatin hòmber tambe ku tabata bin Boneiru for di Kòrsou i Aruba pa tene relashon seksual ku e dos mucha muhénan.
Konsientisashon
Esaki ta solamente un di e hopi kasonan di delitu kontra moral riba e isla. Hopi otro kaso no ta sali na kla i asina no ta bini dilanti wes. Segun Croes komunidat ta na altura di hopi situashon ku ta intolerabel. Croes ke pa hende bira mas konsiente si ta trata di abusu seksual di mucha òf maltrato di mucha. E konsientisashon ta nesesario pa para e abusu, e ta haña. “Si bo ripará algu den komunidat esei ke men ku tin hopi kos mas ta pasa. Mi tin sinku aña ta traha riba e isla i mi ta sinti falta di protekshon di nos muchanan.”
Fundashon Respetá Mucha ke atenshon pa entre otro abusu seksual di mucha, abusu verbal di mucha i maltrato físiko di mucha. Por realisá e konsientisashon pa medio di kampaña informativo den media, manera na radio, na televishon i den korant. Tambe e fundashon lo kologá poster ku e lema “Stòp Abusu di Mucha”.
Sírkulo di akohida
Croes: “Poko poko nos ke lanta e kampaña básiko te ora nos tin un bon sírkulo di akohida pa mucha abusá riba e isla. Tur organisashon i fundashon riba e tereno aki mester kuminsá traha optimalmente.
Komo kordinadó di e departamentu di enseñansa di Stinapa Boneiru, Croes ta traha ku tres mil mucha tur aña. “Mi ta tende keho di mucha ku djis mester di atenshon. Pero hopi be e problema ta mas profundo. I no ta papia di esaki. No tin un kaminda ku por mèldu maltrato i abusu di mucha. Mi ta spera ku un instansha asina lo bini pronto, pasobra aktualmente no ta trata e problema adekuadamente.”
Voogdijraad di Boneiru, Saba i Sint Eustatius for di aña pasá ta duna keho kontra mayor ku ta pèrmití abusu seksual di nan yunan. E indikashonnan di kaso di abusu ta sali for di e gremio di profeshonalnan i ta di spera ku den futuro nan lo lo sali for di komunidat boneriano mes.
Outor: Belkis Osepa