WILLEMSTAD – Misterioso, asina e piskadónan lokal ta yama e barkunan grandi ku den otro parti di mundu ta nabegá bou di bandera di Kòrsou. “Ken ta nabegá e barkunan aki i unda e plaka ta keda?”, asina piskadó profeshonal Edwin ‘Makambí Flameling ta puntra su mes.
Jan Sierhuis di Inspekshon Marítimo por konta ku e barkunan generalmente ta nabegá dilanti kosta di Wèst Afrika pa kue buní. “Esaki a kaba di kuminsá i mayoria di e plaka ku drenta probablemente ta invertí bèk den e proyekto”.
Entrada
Segun Ministerio di Desaroyo Ekonómiko e buní ta subi merkado di Union Oropeo (UO) espesialmente via Spaña. E entradanan direkto ta resultá den un pòst general di gobièrnu. Den futuro mester usa e plaka aki pa piskeria lokal.
E piskadónan na Kòrsou dia pa dia ta pasa mas trabou. Tin ménos piská, e reglanan ta mas severo i e gastunan ta mas haltu. Nan no ta mira masha probecho den hende strañero ku ta gana plaka bou di bandera kurasoleño. “E botonan aki no ta di Kòrsou i no ta yu di Kòrsou ta nabegá nan”, Flameling ta bisa. “Nan ta hasi negoshi ku Oropa i esaki mester trese plaka aden ma nos no ta tende nada di esaki nunka. Mi ta kere tin un otro hende ta ganando masha hopi plaka ku e kos aki.”
E Proyekto di Piskeria Internashonal ta bou di maneho di un komishon. Den e komishon aki bo ta haña entre otro ministerio di Desaroyo Ekonómiko, ministerio di Salubridat, Naturalesa i Medio Ambiente, duana i Inspekshon Marítimo. Aktualmente segun ministerio di Desaroyo Ekonómiko tin tres pa kuater barku bou di bandera kurasoleño ta nabegá serka di kosta di Wèst Afrika i Angola.
“E ministerio di Desaroyo Ekonómiko ta trahando duru na un membresia di Union Oropeo, nos mester kumpli ku tur eksigensia di atmishon”, Sierhuis ta konta. E membresia ta nesesario pasobra e kuota, esta e kantidat di barku ku ta nabegá bou di bandera kurasoleño, por oumentá solamente ora Kòrsou bira miembro. ‘Ora mas boto nabegá bou di bandera kurasoleño, ta e ora ei numa por papia di ganamentu di plaka di bèrdè mes. Por lo pronto mester invertí hopi plaka den supervishon di regla i di e botonan mes.
Segun Erwin Koense, presidente di Piskadó Profeshonal, riba tur e barkunan grandi ta strañero ta nabegá. “No ta pèrmití yu di Kòrsou di probechá di e piskeria aki”, e ta deklará rabiá.
Segun Sierhuis esaki no ta bèrdat, pero e chèns ta chikí ku yu di Kòrsou ke nabegá huntu: “Mayoria di e botonan ta traha ku personal barata di Asia i Afrika. Esaki ta paisnan di sueldi abou i Kòrsou nò. Komo kapitan di un barku grandi asina bo mester di un edukashon i e hendenan ta masha skars. Mayoria di nan ta traha algun aña i despues nan ta haña un bon trabou na tera. E skarsedat aki ta un problema mundial.”
Karchi hel
E Komishon di Piskeria Internashonal pronto lo reuní atrobe. Probablemente nan lo papia di e karchi hel ku Kòrsou a haña. A duna Kòrsou e karchi hel pasobra e supervishon di e barkunan no tabata na òrdu. Awor ministerio, huntu ku UO ta tumando medida pa mehorá esaki.
Outor: Elisa Koek