Alumno ku a slag aña pasá – potrèt: Belkis Osepa
KRALENDIJK – E alumnonan ku mester pasa èksamen na Liseo Boneriano ta prekupá pa e retrasonan den lès na skol i ta bati alarma. Nan tin miedu ku nan no ta bon prepará pa pasa èksamen.
Direktor Joost Latiers ta bisa ku e retraso no ta struktural. “Nos lo alkansá tur lès ku no a sigui na tempu.”
E alumnonan di havo i VWO e siman aki a tuma kontakto ku medionan di komunikashon pa ekspresá nan prekupashon. E alumnonan ta sinti manera skol no ta skucha nan.
E aña aki nan no a haña lès di biologia ainda, kaminda nan ta atras kaba, Karman Fransz di diesshete aña ta konta. E ta den havo 5. “Si e dosente no bini skol djaluna nos ta drenta di tres siman sin haña lès di biologia. Na februari e ta kita for di skol. Nos no sa ainda si un hende lo remplas’é.”
Sin splikashon
Fransz ta konta ku for di tempu ku e tabata den havo 1 e lèsnan di biologia tabata kai afó. Michelle Gumbs (18) tambe ta konfirmá un retraso grandi. “Anto mas pió ta ku e tabata duna lès malu. E kontestanan riba e enkargonan e tabata lesa nan sin duna splikashon. Ta p’esei e klasnan ta hopi suak den biologia. Nos mester di ayudo i guia pa siña e materia promé ku èksamen.”
No ta biologia so tin retraso. “Seka matemátika tambe ta trata di un retraso”, Fransz ta bisa. Aña pasá e dosente tabata malu i asina hopi lès a kai afó. For di e aña aki nan ta haña matemátika atrobe, pero den e klasnan mas abou nò. Ainda e dosente no por traha full time.
Struktural
Direktor Joost Latiers ta refutá ku e retrasonan na Liseo Boneriano ta struktural. Kontrali na e alumnonan ku mester pasa èksamen e ta papia di un retraso di dos siman. “Un retraso no por bira struktural si un dosente tin dos siman malu. E kos ta bira un problema ora ku e dosente ta malu pa hopi tempu i no tin niun hende pa remplas’é.”
Latiers ta bisa ku probablemente e dosente malu lo ta bèk na skol djaluna atrobe. Na medio di februari e skol lo haña un dosente nobo pa lèsnan di biologia. “E lesnan ku a kai afó probablemente por alkansá nan riba djasabra.” E ta rekonosé ku esaki ta un peso èkstra pa e alumnonan di èksamen. “Mi no ta bisa ku un ke otro ta agradabel.”
Media
E direktor ta masha malkontentu ku e alumnonan a papia ku medionan di komunikashon. Latiers: “Semper nos ta wak via e mèntòr i e lider di tim si tin un solushon. Nan mester konfia ku nan ta haña lès èkstra. E tempu ta pèrtá si ma nos lo hasi tur loke ta posibel pa nan bai òp pa èksamen bon prepará.”
Michelle Gumbs ta haña ku e kontaktonan ku prensa tabatin resultado. “Awor nan a bin papia ku e klas. Promé ku esei tabatin un silensio dos siman largu.” Karman Fransz ta enfatisá ku banda di e mal komunikashon semper e alumnonan ta tende ku ‘ainda no tin solushon’. No tin sufisiente atenshon pa nan preparashon total pa èksamen. Latiers a atmití ku e no tabata na altura di un retraso den matemátika.
Derecho
E alumnonan ku mester pasa èksamen ke trese nan situashon bou di atenshon di ministerio hulandes di Enseñansa, Kultura i Siensia i Kuerpo Públiko Boneiru. Fransz: “Nos tin derecho di ekspresá nos mes i trese e problema aki dilanti meskos ku studiante hulandes na Hulanda oropeo. Lei ta bisa ku gobièrnu mester pèrkura pa kontinuidat den enseñansa den Reino. Ta p’esei nos ta bati alarma.”
Outor: Belkis Osepa