Still di e video di menasa ku a sali despues di e asesinato di Helmin Wiels
WILLEMSTAD – E ruman hòmbernan Martis, ku a traha e vidio di menasa ku djis despues di e asesinato di parlamentario Helmin Wiels a sali riba internet, awe ta dilanti wes atrobe. E ruman hòmbernan ta spera di haña eksonerashon i haña apsolushon di a kometé un menasa terorista.
“Nos ta komprondé ku e trailer a kai kompletamente malu i ku a sak’é totalmente for di kòntèkst”, Valentino Martis ta bisa den un entrevista eksklusivo ku Ret Karibense. “Pero nos no ta terorista. Nos ta siudadano nòrmal ku ta traha duru den e komunidat aki pa un mihó futuro.”
Riba 7 di mei a detené e hòmbernan den relashon ku distribushon di un vidio riba Youtube, kaminda nan ta anunsiá ku e asesinato di Wiels ta e promé un den un seri. Na promé instansha a detené e rumannan komo sospechoso di e asesinato pero djis despues a kambia e keho den ‘menasa di un krimen terorista’. Riba 16 di òktober a haña nan kulpabel i a kondená nan na un kastigu preliminario den sèl pa seis luna ku tres aña di periodo di prueba i 240 ora di kastigu di trabou.
Spònser
“Nos lo bringa e sentensia aki te na final i nos ta spera ku nos por konvensé tur hende ku nos no tin nada di hasi ku terorismo”, Valentino ta bisa ku resolushon. “E link bou di e sine tabata un ‘marketing gimmick’. E sine no tin nada di hasi ku morto di Helmin Wiels. Nos úniko motivashon tabata pa haña spònser pa por produsí un dokumentario kòrtiku.”
Valentino i su ruman Hermann tin miedu ku e sentensia lo tin hopi influensha riba nan futuro. Hermann ke bai kore stazje na Merka i Valentino ke biaha pa Merka i Canada den futuro pa hasi negoshi einan. “Si bo haña marka di terorista na un edat asina hóben, futuro ta pinta skur”, Valentino ta bisa.
Problema sosial
“No ta promé be ku nos ta traha un sine òf trailer tokante problema sosial ku tin impakto grandi na Korsou”, Hermann ta bisa. “Nos pashon pa traha sine i trailer asina a nase pasobra komo hóben nos ta futuro di Kòrsou. Nos ke mira un mihó Kòrsou pa nos tur.”
Segun Hermann e intenshon di nan sinenan ta pa ‘hasi hende mas konsiente di kos ku no ta bai bon den komunidat i mustra nan kon anda ku esaki na un manera positivo’. “Komo ehèmpel nos por menta ku despues di a filma kaya kibrá den diferente bario nos a sera e burakunan ku poko semènt.”
E rumannan ta enfatisá ku nan sinenan no ta polítiko sino sosial. “Nos no ta aktivo polítikamente i ademas polítika no ta interesá nos tampoko”, Valentino ta bisa. Sentensia di e apelashon lo ta djaweps 6 di februari.