muziek (640x480)

KRALENDIJK – For di e siman aki shen mucha Boneriano ta haña les grátis di músika pa asina desaroyá nan talento.

 
E proyekto Músika ta konta ta duna shen mucha entre nuebe i dieskuater aña e oportunidst pa sera konosí ku músika. Nan ta siña toka riba instrumentunan krioyo i di brassband.

Un reportahe di Belkis Osepa

Tempu liber
“E muchanan ke tin algu di hasi den nan tempu liber”, asina Marieke Knol dje fundashon Plataforma Kultural inisiadó dje proyekto, ta bisa. “E proyekto no ta tokante formashon musikal só, pero tambe formashon soshal. Kada mucha tin derecho riba aktividatnan ku tin di aber ku arte i kultura. Asian e tratado di mucha di Unicef ta bisa.”

 
E sera konosí ku les di músika ta dura sèis luna. Esnan ku ta interesá pa sigui toka un instrumentu, por hasi esaki na e skolnan di músika ku tin na Boneiru. Knol ta informá kus u fundashon ta traha riba un fondo kultural pa hubentut, ya asina por paga e lèsnan di e muchanan interesá pa sigui desaroyá nan mes. Alabes lo kubri asina tambe e salario dje dosentenan.

 
Dosente Francis Domacasse ta kontentu ku e entusiasmo dje muchanan. “Na Boneiru no tin hopi kos pa e muchanan hasi. Muzik ta algu great pa un hende por siña. Nos ta kuminsá hinka e músika den nan, pa den futuro nan disidí pa hasi algu riba tereno di muzik. Ora bo ta chikí bo ta siñ’é mas lihé ku ora bo bira grandi.”

 
Outor: Belkis Osepa