Sushi no tapá na Landfill Malpais – foto: Kokomo Beach
WILLEMSTAD – E kompania di prosesá sushi Selikor den 24 ora mester prosesá i tapa e sushi di kas ku a depositá ei. Kadaver di animal mester pone mésora den un buraku den tera i dera nan tras di e bòrchi ‘bestia morto’.
Si Selikor no hasi esaki tin un but di 5000 mil florin pa kada dia òf parti di un dia ku nan keda sin kumpli for di 48 ora despues di e sentensia, ku un máksimo di 250 mil florin.
E abogado di doño di Kokomo Beach Toin van de Mosselaar, Dave Liqui-Lung, ta bisa ku e ta masha satisfecho ku e sentensia. “Selikor a avansá basta ku tapamentu di sushi i nos ta spera ku lo keda asina.”
No tapá
Van de Mosselaar a entamá e kaso sumario despues ku pa motibu di un infestashon di muskita kontinuo e mester a sera su restorant kant’i playa varios be. Segun e, e problema ta seka Landfill Malpais kaminda el a topa ku ‘áreanan grandi di sushi no tapá, bestia morto ku bichi i hopi sushi ku tabata putri’. Operations Manager na Selikor, John Cijntje, kuminsamentu di e luna aki a atmití ku e sushi na Malpais a keda un temporada sin tapa pasobra e material pa usa p’esaki a kai afó.
Segun e abogado e kaso sumario ta e promé paso. “Ku e kaso sumario nos ke solushoná e infestashon di moska mas lihé posibel. Pasobra un prosedura di fòndu por dura hopi mas largu. For di e sentensia ta sali ku ta probabel ku e wes di fòndu lo konsiderá e molèster komo ilegal kontra Kokomo. E di dos paso pa nos ta di pidi indemnisashon.” No por a alkansá Selikor pa komentario.
Outor Leoni Leidel-Schenk