E lista kompleto di komestibel di Ret Karibense ta konsistí di: 1 kilo di aros blanku, 1 liber di manteka, 1 pan blanku, 1 kilo di batata, 6 webu, 1 liter di zeta di girasol, 1 galiña kompleto (mas o ménos 1 kilo), 1 liber di karni stobá, 1 liber di keshi ‘jong belegen’, 1 liter di lechi semi-deskremá, 1 bleki grandi di ‘bruine bonen’, 1 bleki grandi di pitipuá, 1 liber di wòrtel, 1 liber di apel, 2 kilo di apelsina, 1 sèleri, 1 kilo di siboyo, 1 kilo di tomati, 1 kònkomber, te (20 x 4gr), kòfi (250 gram), papel di wc, habon di laba man (3 pida) i habon di laba paña (aproksimadamente 2,2 kilo).
Na Boneiru, a kumpra e artíkulonan dia 22 di yanüari i na Hulanda dia 23 di yanüari, na Arnhem.
Den tur kaso, Ret Karibense a bai pa e opshon mas bentahoso. Bo no ta haña presis e mesun produktonan tantu na Hulanda komo na Boneiru, i tin biaha e opshon di mas bentahoso no ta kontené mes tantu kantidat di e produkto. Debí na esei, aki i aya e markanan kumprá ta diferente i tin biaha grandura di e empake tampoko no ta meskos. P’esei, un par di biaha a kumpra produkto den empake un poko mas grandi na e supermerkadonan na Hulanda kompará ku na Boneiru (por ehèmpel keshi, na AH (925 gram), karni stobá na Lidl (600 gram) i den tur dos tienda, kòfi (500 gram) i batata (2,5/3 kg). Den e investigashon akí, a konta e preis di e kantidat kumprá realmente.
Den e artíkulo akí, a usa e tipo di kambio: 1 euro = 1,3558 dòler.
