Polis ta investigá e outo i e restonan kimá – potrèt: Extra Boneiru / Boi Antoin
KRALENDIJK – Boneiru ta arib’abou despues ku a haña dos kurpa sin bida den anochi di djaweps pa djabièrnè. Ta trata di dos persona ku a fayesé na un manera basta straño. E investigashon di Ministerio Públiko ta koriendo. Polis te awó ta papia di dos kurpa sin bida.
Di un persona a haña su kurpa kimá manera karbon den un outo ku a kima kompletamente na Rincon, banda di Sabana Piedra Krus. E persona tabata sintá na e banda di pasahero dilanti den e outo. Brantwer a traha oranan largu pa haña e situashon bou di kòntròl. Despues di paga e kandela den e outo polis a kuminsá ku investigashon forénsiko.
E di dos kurpa a haña den un dam tras di e skol SGB na Boneiru. E persona tabata bistí na un bòksershòrt i e tabatin diferente kòrtá hundu na su kurpa. E deskubrimentu di e kurpanan sin bida a pone ku e kaminda grandi entre Kralendijk i Rincon tabata será pa trafiko den oranan di meinta. A pasa outomobistanan via un ruta alternativo. Entretantu tráfiko a normalisá atrobe.
Polis no ke duna deklarashon ainda. A sera e dos luganan kaminda a haña e mortonan kompletamente. Polis ta investigá e sirkunstanshanan rònt di e dos mortonan ma ainda no ta papia di asesinato. Rumornan tokante kiko e insidentenan ekstrabagante aki por nifiká ta skeiru riba e isla chikitu. Nada no ta indiká ku e dos kasonan di morto ta relatá pero e komentario general na Kralendijk ta ku ta ‘mashá di kasualidat’ ku ta haña dos morto na e mésun ora.
Outor: Belkis Osepa