Raylison Martina

Raylison Martina

WILLEMSTAD – Raylison Martina ta rabiá, tristu i desapuntá despues di e ekspreshonnan di siruhano Patrick Fa Si Oen den e korant Amigoe. E sirahano ta kleim ku e operashonnann pa hasi stoma mas chikí na Kòrsou ta seif.

 
Martina su tata tabata un di e sinku kasonan kaminda pashènt a muri, loke a pone e operashonnan aki para. For di dia ku el a entregá keho seka Inspekshon di Salubridat, Martina no a tende nada mas di su kaso.

 
Den e artíkulo den korant ta deskribií e keho komo ‘ekseso di un siruhano ku a deliberá, kalifiká i finalisá den un kaso disiplinario médiko privá’. “For di e korant mi por dedusí ku ta trata di mi kaso. Pakiko anto no a informá famia di e defuntu?”, e ta puntra su mes, pasobra ainda e ta wardando un reakshon.

 
Media
Fa si Oen ta bisa ku ‘tres asistènt di spesialista independiente’ a hasi investigashon ku lo a saka ku operashon pa hasi stoma mas chikí den Sehos ta igual den kalidat na esnan mihó di mundu, basá riba e mortalidat ku internashonalmente ta aseptá.

 
“Si Fa Si Oen ta pretendé ku a hasi e investigashon na un manera habrí i transparente mi ta pidié pa publiká e rapòrt. Mi tin gana di sa ta ken e médikonan internashonal ta ku ta evaluá e resultadonan. Mi ta puntra mi mes tambe pakiko no ta e médikonan internashonal mes a hasi e investigashon, sino asistente”, Martina ta bisa.

 
Paro
“Ta inspekshon so por disidí si ta anulá e paro riba operashon di hasi stoma mas chikí”, inpektor general suplente Joe Alcalá ta bisa. Na novèmber inspekshon a haña un karta di e organisashon profeshonal di siruhano, ku tabatin un investigashon ta kore kaminda lo a bin sali ku por hasi e operashonnan sin peliger. “Te awe mi no a risibé e resultadonan di e investigashon”, Alcalá ta bisa.

 
“Si hòspital ke hasi un investigashon ta nan libertat. Nos tin pregunta tokante e independensia. Aparentemente siruhano Fa Si Oen ta haña ku e investigashon aki ta sufisiente. Ta bon, pero ta inspekshon ta disidí.” Na oktober a bolbe prolongá e paro pa seis luna.

 
Alcalá ta puntra su mes tambe kon amplio e investigashon ta. “No ta trata solamente di mortalidat, e ta keda un intervenshon ku por ta diferente den kada pais. Ademas ta parse manera ku nan a investigá solamente e dokumentonan di hòspital. Kiko awor si un hende a muri nan kas? Mi no por imaginá mi ku nan a evaluá esei.”

 
Sifra
Direktor médiko Cai Winkel ta bisa ku e ta sigur ku e asistèntnan di spesialista ku a hasi e investigashon ta independiente “E sifranan ku a usa no ta kalke sifra ku a buska”, e ta kontestá riba e pregunta si por konfia e sifranan. “Un panel di eksperto internashonal a wak e sifranan i nan ta kompletamente di akuerdo ku e programa di hasi stoma mas chikí di Sehos ta ekselente.”

 
Den e rapòrt entremedio di èks inspektor Jan Huurman riba 18 di aprel 2013, ora ku a prolongá e paro riba e operashonnan, tin pará ku a hasi un total di 326 operashon di hasi stoma chikí. Sinku pashènt a muri djis despues di e operashon, pa kousa di komplikashon. Esaki ta un mortalidat peri-operativo di sigur 1,5 porshento, loke segun inspekshon tabata muchu haltu. Durante su investigashon segun Huurman a bin sali tambe ku no por a presentá un registrashon di komplikashon di hopi di e 326 operashonnan.

 
Fa Si Oen den e entrevista ku Amigoe ta bisa ku e èks inspektor a imponé e paro muchu prematuramente. “Mi intervenshon a bini ora ku mi a risibí señal di inseguridat, keho i asta kaso di fayesementu”, Huurman ta konta. “E grupo profeshonal di siruhano no a raportá esakinan. Delantá mi a papia ku Fa Si Oen. Pasobra nan no ker a revelá nada mi a pone un paro pa por hasi investigashon.”

 
Huurman ta haña malu ku no ta un tim independiente a hasi e investigashon. “Bo por presentá e resultado na un grupo internashonal si, pero si esakinan no tin akseso na e datonan original, esaki no ke men nada. E problema di mas grandi ku mi tabatin komo inspektor tabata pa saka e datonan na kla. Ademas no ta eksistí otro kaminda na mundu ku ta asistènt di spesialista ta hasi e tipo di review aki.”

 
Fa si Oen no tabata alkansabel pa komentario

 
Outor: Leoni Leidel-Schenk