Pachi’s Place – potrèt: Belkis Osepa
KRALENDIJK – Gezaghebber Lydia Emerencia dia 30 di yanüari ta sali pa Hulanda pa duna un empuhe na e deliberashonnan pa habri e kas di plaser Pachi’s Place bèk.
Konseho insular tin miedu ku prostitushon ilegal na Boneiru lo sigui eskalá tanten ku Pachi’s Place keda será. Den un debate di urgensia eilandsraad a insistí serka Emerencia pa hasi tur loke ta posibel pa por habri e kas di plaser atrobe.
Investigashon Viejo
Paradise Inn, Pachi’s Place den boka di pueblo, tin kasi un aña i mei será despues di un invashon. Hustisia ta sospechá e doñonan di trafikashon di hende. A detené tres persona e dia ei. A base di e persekushon penal a suspendé prolongashon di e pèrmit di Paradise Inn.
E asina yamá investigashon Viejo, ku ta dirihí riba eksplotashon seksual di hende muhé, ainda ta koriendo. Durante un investigashon na gran eskala a interoga tres prostituta i tres sospechoso intensivamente. Entretantu e sospechosonan a sali liber. Ta spera ku pronto lo trata e kaso den korte.
Diferente miembro di konseho insular ta pinta situashonnan ku ta sali fo’i man, kaminda ta trata di e oumento di prostutushon den barionan. Jeffrey Levenstone (UPB): “Dosshen meter pariba di mi kas, mèimèi den un bario, tin un kas di plaser. Doshen meter pabou di mi kas tambe. Mas leu den Kaya Korona tambe tin dos kas di plaser ilegal. Mi tambe ta mira un oumento for di dia ku a sera Pachi’s Place.”
Enfermedat
Diferente miembro di konseho insular tin pregunta tokante e kòntròl riba prostitushon ilegal. Nan ta sinti falta di e kòntròlnan riguroso. Entre otro e miembro di Eilandsraad Benito Dirksz (MBL) a hasi Emerensia pregunta tokante un posibel oumento di enfermedat ku ta transmití den relashon seksual. “Mi ke sa si tin sifra di e kantidat di kaso di e enfermedatnan aki i si tin indikashon ku nan a oumentá for di dia ku a sera Pachi’s Place.”
Durante e debate Emerencia a bisa ku e no tin kontesta riba e preguntaan. Ta e instanshanan okupá ku salubridat públiko ta enkarga ku esaki. Gezaghebber a indiká si ku seramentu di e kas di plaser por ta kousa di mas enfermedat venériko. “Otro faktor na Boneiru, manera esnan sosial ekonómiko, tambe por kousa un oumento di enfermedat venériko.”
Sint Eustatius
Dirks a bisa ku na Sint Eustatius tambe ta trata di un maneho tolerante relatá ku kas di plaser. Riba e isla ei si un kas di plaser por hasi negoshi bou di sierto kondishon pero na Boneiru nò. Dirksz ta haña ku Hulanda ta midi ku dos midí den Hulanda Karibense.
Emerencia a haña komo enkargo pa boga fuertemente pa habri Pachi’s Place bèk, pasobra ta dura muchu largu prome ku ministerio di Asuntunan Eksterior tuma un desishon. Durante e debate di emergensia Emerencia a bisa ku den palabrashon ku hustisia, e kompania Paradise Inn i e famia ku ta manehá e negoshi, a disidí pa lòs e trayekto penal for di e re-apertura di Pachi’s Place. “Nos a palabra ku e famia ku e trayekto penal ta sigui. A formulá kondishon i manera resolvé e último opstákulonan, lo re-aktivá e maneho di toleransha.”
Di 30 di yanüari te 4 di febrüari Emerencia ta na Hulanda pa papia ku ministerio di Asuntunan Eksterior. Mester palabrá tambe e dunamentu di visa pa e hende muhénan ku ta bin traha den Pachi’s Place.
Outor: Belkis Osepa