Elia Isenia – potrèt: Dick Drayer
WILLEMSTAD – “Lo e no gana, pero su partisipashon ta históriko si, un atrakshon di bèrdè mes”. Esaki Filomena ‘Elia’ Isenia ta bisa di Maarten Schakel. E DJ hulandes di Dolfijn FM, huntu ku e banda Wesu di Hector Samson, ta partisipá na e festival di tumba 2014. Su tumba yama ‘Stobá di Tumba’, un komposishon di èks Rei di Tumba Farley Lourens.
Isenia, ku a gana e festival na 1991 i 2010, e aña aki ta partisipá pa di 22 be. E tambe ta kanta ku Wesu i meskos ku Maarten e ta ensayá tur anochi den Hòfi Bill na Veeris.
Dick Drayer ta papia ku Elia Isenia
“Su tumba ta bon, pero e mester profundisá mas. E por, ma nos mester ta honesto si”, Isenia ta bisa. “E mester drenta mas den nos kultura, nos manera di kanta i nos ritmo.”
Segun e èks Reina di Tumba Schakel su partisipashon ta importante pa integrashon di hulandesnan na Kòrsou. “Su tumba tokante kuminda i kushina di Kòrsou lo duna tur hulandes gana di sa mas tokante di esaki. Nan lo siña konosé un parti di nos kultura. Festival di Tumba ta importante pa nos”, Isenia ta bisa.
Peter van der Pligt
Maarten ta e di dos hulandes ku ta partisipá na Festival di Tumba. Na 1992 Peter van der Pligt tabata e promé. El a partisipá ku e tumba ‘Kumpli kuné’, e tumba mas toká di e aña ei. Segun Isenia Peter e tempu ei tabata mas avansá ku Maarten awor. “Pero ku un públiko animá i e euforia ku ta reina tur kos ta posibel”, segun Isenia.
Outor Dick Drayer