André Bosman (potrèt di archivo) – potrèt: Jamila Baaziz
WILLEMSTAD/DEN HAAG – Segun e komishon independiente Meijers e lei di Bosman ta kontra sinku tratado internashonal i dos direktiva di Union Oropeo. Esaki e komishon ta bisa den un anotashon na Tweede Kamer.
Komishon Meijers ta bisa ku nan ta konsiente ku ta un parti relativamente chikí di hulandes antiano ta kousa problema, pero e komishon ta haña ku un proposishon pa un lei ku ta distinguí direktamente entre siudadano hulandes i hulandes antiano no ta kuadra ku Hulanda su debernan internashonal.
Diskriminashon di rasa
E lei di inisiativa ke pone limitashon pa yu di Kòrsou, rubiano i habitante di Sint Maarten por establesé libramente na Hulanda. Segun e komishon e distinshon entre hulandes antiano i oropeo ta distinshon di rasa, loke ta bai kontra e Tratado kontra Diskriminashon di Rasa.
“E areglo ku a proponé pa establesementu i sakamentu di hulandes antiano ta kontra obligashon di tratado i di e ‘Unierecht’ primario”, asina tin para den e anotashon. Ademas si Hulanda aseptá e proposishon aki lo e haña un posishon di eksepshon den Union Oropeo i na mundu: “Ningun otro miembro di Union Oropeo, ku ántes tabatin kolonia pafó di Oropa, no konosé un lei asina di partishon di nan propio siudadanonan.”
Hulandes blanku
Na final e komishon ta konstatá ku ‘no ta menta e efektonan pa hulandes di otro grupo di imigrante’. “Asina e areglo di para hende riba kaya ta trese e riesgo real pa tur hulandes koló skur ku polis por para nan. Ta kon polis ta bai rekonosé un grupo di hulandes antiano relativamente chikí ku no tin e ‘permit di establesementu’ nesesario riba kaya òf otro kaminda? Ta asepta e riesgo aki pa sentenar di mil hulandes numa. Hulandes blanku nunka lo no sufri molèster di esaki”, asina e komishon ta konkluí.
Outor: Leoni Leidel-Schenk