E abogadonan ta deliberá kontinuashon di e kaso Zambezi – potrèt: Belkis Osepa

E abogadonan ta deliberá kontinuashon di e kaso Zambezi – potrèt: Belkis Osepa

KRALENDIJK – E apelashon antisipá kontra e desishon di wes pa no inkluí e kehonan di korupshon atministrativo den e kaso Zambezi, ta tuma luga dia 7 di mart na Kòrsou.

 
E kaso Zambezi a suak hopi kuminsamentu di desèmber, ora ku wes Irma Lips a disidí di no inkluí e akusashonnan di korupshon atministrativo kontra Ramoncito Booi i Burney Elhage den e kaso penal.

 
Segun Lips Ministerio Públiko (OM) a pasa límité di e òrdu di Korte Komun den kuadro di e investigashon hudisial. Ku esaki Booi i Elhage a haña nan promé éksitonan ku nan tim di defensor di abogadonan Knoops. E tratamentu tokante e kontenido di e kaso penal ta dia 24 di mart na Boneiru.

 
Hurisprudensia
Abogado Geert-Jan Knoops i su tim ta presente dia 7 di mart pa hiba e defensa. Despues di entrega di e petishon, fiskal Henry Hambeukers a bisa ku a base di hurisprudensia ta posibel pa tene un apelashon antisipá, promé ku un tratamentu di kontenido tuma lugá.

 
Knoops ta bisa ku den su opinion un apelashon antisipá asina no ta posibel hurídikamente. “Meskos ku na Hulanda lei ta permití un apelashon di un sentensia antisipá solamente si e sosodé pareu ku e sentensia final. Esaki no ta e kaso aworaki komo ku no tin un sentensia final.”

 
Sentensia korekto
OM ta haña ku no por deskonektá e echonan pa kua awor ta persiguí Booi i Elhage, esta froude di hipotek i labamentu di plaka, di korupshon. Defensa no ta di akuerdo ku esaki. Knoops: “Korte a pasa un sentensia hurídikamente korekto komo ku nan no a konekta e sospecho di e asina yama korupshon atministrativo ku e dos echonan ku korte a pèrmiti di persiguí.”

 
Outor: Belkis Osepa