WILLEMSTAD – Televishon di internet, telefon selular i e aparatonan di mas nobo mas i mas ta amplia e oferta di vidio mundialmente. Na Kòrsou tambe e kantidat di medio di komunikashon ta krese masha lihé.
TeleCuraçao, e emisora di televishon di mas grandi di e isla ta mira e desaroyonan nobo komo un desafio. “Desaroyo nobo ta tene nos skèrpi”, Hugo Lew Jen Tai, direktor di TeleCuraçao ta bisa. “Di tur manera nos no tin miedu di nan.”
TeleCuraçao ta trata di keda al tantu riba mayoria di e áreanan di desaroyo. “Nos tin basta tempu ta transmití via internet i for di yüli di aña pasá tin un TeleCuraçao app”, Lew Jen Tai ta konta. Ta bai traha tambe riba kalidat di e emisora i p’e motibu ei lo upgrade e studio. “Ya nos tin poko tempu kaba ku komo úniko nos ta transmití na HD (high definition). Esaki ta e teknologia di mas nobo. E seis lunanan binidero nos ta bai harma nos studio ku e aparatonan di mas nobo.”
Yegada nobo
Energia Vishon, Nos Pais i Notisia360 ta yegada nobo den e mundu di televishon kurasoleño. Èks polítiko di Boneiru Ramoncito Booi ta e inisiadó di Energia Vishon. Ku su emisora e ke komplementá e oferta aktual na Kòrsou, i tambe den sobrá di Reino. “Hopi be mi ta tende ku hende no ta kontentu ku loke televishon tin di ofresé aktualmente. P’esei mi ke purba algu nobo. Aktualmente mi ta stream pa Boneiru i pa medio di interkambio di programa ku Hulanda, Energia por forma un brùg den Reino. Lo envolví Aruba i Islariba tambe den e plan.”
Medio di komunikashon independiente
Na mart Mavis Albertina ta kuminsá ofishalmente ku su emisora Nos Pais. E stashon mester bira un emisora pa i di hóben na Kòrsou i na Hulanda. “Nos ta stream live pa Hulanda i den futuro nos ke transmití via kabel hulandes tambe.” Nos Pais ta un inisiativa di Mavis i su kasá; nan mes a invertí den e emisora i segun Albertina esaki no sa sosodé masha. “Mayoria di medionan di komunikashon na Kòrsou ta relashoná na un partido polítiko. Nos ta kompletamente independiente. Esaki por hasi e kos poko mas difísil. Tampoko no ta fásil pa haña spònser pasobra mayoria di nan ke finansá programa di entretenimentu. Fortunadamente mi tin hopi eksperiensha i aktualmente mi ta buskando fondo na Hulanda pa Nos Pais.”
Multimedial
Notisia360 fin di mei ta kuminsá ku e emisora nobo iRTV. E website di notisia ke forma un stashon grandi multimedial. “Nos no ta bai suministrá solamente radio i televishon sino internet, social media i app tambe”, redaktor hefe Mario Kleinmoedig ta konta. “Aktualmente nos ta preparando pa lanta un redakshon.”
Puntonan positivo
Maneho di CBA, un emisora relativamente chikí kompará ku TeleCuraçao, ta hopi konsiente di tur e yegadanan nobo aki. Pa no pèrdè televidente nan ke fortifiká nan posishon riba merkado. “Bo no por para desaroyo i yegada nobo. E arte ta pa fókùs riba bo puntonan fuerte i CBA ainda ta krese lihé.”
Via internet por sigui CBA 24 ora pa dia i e stream ta mehorando. Tambe CBA ke fiha riba programanan edukativo i informativo. E aña ku ta bini e emisora lo transmití no solamente na papiamentu i hulandes, sino na ingles i spañó tambe.
Outor: Elisa Koek