Still di e video di menasa ku a sali despues di e asesinato di Helmin Wiels

Still di e video di menasa ku a sali despues di e asesinato di Helmin Wiels

WILLEMSTAD – Awe tardi wes a konfirmá e sentensia kontra e trahadónan di e vidio di menasa, Valentino i Hermann Martis. E ruman hòmbernan a apelá pasobra segun nan nunka nan no ker a forma un menasa pa Kòrsou intenshonalmente.

 
E abogado di e rumannan, Alicia Bonk, ta poko sorpresá ku e sentensia. “Niun ora mi no a spera esaki i mi no ta di akuerdo ku e motibunan di e wes pa pasa e sentensia aki.”

 
Defensa a deklará ku e intenshon di e vidio di menasa tabata komo trailer pa un dokumentario tokante problema sosial. “Nos pashon pa traha e tipo di sine i trailer aki a surgi pasobra komo hóben nos ta futuro di Kòrsou. Nos ke mira un mihó Kòrsou pa nos tur”, Hermann Martis a deklará anteriormente den un entrevista ku Ret Karibense. E defensa a deklará tambe ku no tin un relashon entre e vidio di e mucha hòmbernan i morto di e polítiko Helmin Wiels of e rebelion di 30 di mei 1969.

 
Ta pa malu
“E relato ta kompletamente inkreibel”, wes a bisa awe. El a forma e huisio aki pa motibu di e momento ku a publiká e vidio riba youtube, algun ora despues di morto di Wiels; pa motibu di e deskripshon bou di e vidio i menshon di e fecha di 30 di mei 1969. “E trahadónan sa ku e fecha aki ta kargá. Esaki den kombinashon ku e menasa den un bos kambiá ta mustra ku a skohe tantu e kontenido komo e sirkunstanshanan masha konsiente mes.”

 
Niun prueba
Abogado Bonk ta bisa ku por neglishá e pruebanan ku wes a bini kuné. “A bini ku prueba ku mi klientenan a traha i publiká e vidio. Pero no ta pa esaki a kondená nan awor. Den mi defensa mi a bisa ku e pruebanan aki no ke men nada. Ta opvio ku nan ta konvensí ku mi klientenan a traha e vidio komo menasa, pero bo mester prueba esaki legalmente tambe. Den mi opinion komo abogado esaki no a sosodé sufisientemente.”

 
Kasashon
Valentino anteriormente a bisa kaba ku e i su ruman lo bringa e kaso te na final. Bonk no sa ainda si en berdat e rumannan Martis lo rekurí na kasashon. “E desishon ta den man di mi klientenan, pero mi ta kere si ku lo tin sentido pa nan hasi esaki. Si nos rekurí na kasashon, nos ta bai Korte Mayó i ei lo no ta trata mas di e echonan mas di e kaso sino di e huisio di e hurisdikshon.”

 
Segun Blonk ta trata solamente di e huisio. “Ki ora ta trata di intenshon, ki ora ta trata di intenshon preliminar i ki ora ta trata berdaderamente di menasa? Mi ta bai palabra e notisia di awe ku e ruman hòmbernan promé anto djei nos ta wak si nos ta sigui.”

 
Outor: Elisa Koek