Minister Ronald Plasterk – potrèt: Leoni Leidel-Schenk
DEN HAAG – Minister hulandes Ronald Plasterk di Asuntunan Interior i Relashonnan den Reino lo reakshoná pa mas lat dia promé di mei riba e fayonan serio den Kordinashon di Reino na Boneiru, Sint Eustatius i Saba.
Un análisis ta konkluí ku e kordinashon di gobièrnu hulandes na Hulanda Karibense no ta sirbi di niun manera.
Den un karta na Tweede Kamer Plasterk ta bisa ku loke a bin sali despues di un investigashon di e kordinashon ta konfirmá ‘su impreshon di e seriedat di e situashon’. E rapòrt di investigashon ta e promé parti di un evaluashon profundo di Kordinashon di Reino. Tweede Kamer a risibí e rapòrt ku tabata kla for di novèmber, despues ku a lèk e kontenido na medionan di komunikashon.
Konfiansa
E investigashon, ku Inspekshon Señalamentu di Guia (ISB) di Ministerio di Asuntunan Eksterior (BZK), ta mustra, mester hasi hopi pa mehorá e kordinashon riba e islanan. Ta trata di falta di un planifikashon integrá di mas aña pa e islanan BES, falta di konfiansa mutuo i koperashon, mal komunikashon, falta di direkshon i bon sintonia i falta di interkambio di idea i vishon.
For di desèmber, despues di presentashon di e rapòrt, Plasterk a nombra un komishon atministrativo ku mester investigá e Kordinashon di Reino den e areanan estatal i di gobièrnu. Plasterk ta spera e luna aki mes di haña proposishon al kaso tokante esfuerso i direkshon di BZK i e ròl di e departamentonan di Reino. Ademas e komishon mester hasi rekomendashon konkreto tokante e responsabilidatnan di e Representante di Reino i un mihó konekshon entre Kordinashon di Reino, Representante di Reino i e tres kuerponan públiko.
Stolte
E rapòrt di investigashon ta destruktivo pa Representante di Reino Wilbert Stolte. For di kuminsamentu di su karta Plasterk a enfatisá ku Stolte lo baha di su funshon riba promé di mei. Stolte no a ehekutá su funshon bon. No ta konfié ni na Hulanda ni na e tres islanan.
Un di e konklushonnan di e investigadónan ku motibu di e entrevistanan individual ta: “Su ròl di kordinadó no ta bai muchu mas leu ku dunamentu di informashon selektivo durante un deliberashon semanal di hefenan di departamento. Segun e partisipantenan di e deliberashon di hefenan di departamento no tin un agènda di maneho i e deliberashon kasi nunka no ta kontené diskushon tokante kontenido.” E relashon di Stolte ku e kuerponan públiko ‘generalmente no ta bon’, e investigadónan ta bisa.
ISB ta rekomendá pa nombra un Representante di Reino temporario te na e evaluashon grandi di maneho na 2015, ku por ‘trankilisá’ e funshon. E representante nobo mester tin un eksperiensha atministrativo amplio i bon komprenshon polítiko. Pero e mester ta independiente i no mester ta envolví den partido.
Outor: Belkis Osepa