Bonerianonan mes mester pèrkurá pa nan seguridat – potrèt: Belkis Osepa
KRALENDIJK – Bonerianonan ta aspirá pa nan mes kuida nan seguridat. Tin masha hopi kriminalidat riba e isla. E asesinato dòbel di dos siman pasá a trese intrankilidat. Tòg mayoria di e bonerianonan ku a puntra riba kaya ta bisa ku nan ta sinti nan mes seif.
Ounke bida diario na Boneiru a bira normal atrobe despues di e dos asesinatonan, regularmente ta komentá riba nan si. Polis i Ministerio Públiko a haña hopi tep i informashon pero ainda no a detené niun hende. E investigashon ta kore ainda.
Víktima
E sintimentu di seguridat ku motibu di e kriminalidat ku ta oumentando na Boneiru, ta varia. Tin boneriano ku no ta sinti nan mes seif. Espesialmente si nan a eksperiensha kriminalidat djaserka, por ehèmpel kiebro, atrako i hòrtamentu di outo. “Si un hende a bira víktima e ta sinti su mes ménos seif”, inspektor hefe di polis, Jossy Rosales, ta bisa. “Bo no por kita e sintimentu ku a surgi despues di loke ku a pasa. Semper nos ta referí e víktimanan na e ofisina di ayudo di víktima.”
Siudadano ta sinti nan mes seif si nan tin e sintimentu ku nan lo no kai den e sirkuito di kriminal. Freddy Cicilia ta penshoná i ta perkurá bon pa su propio seguridat. “No ta e Boneiru mas di binti aña pasá. Mi ta tene kuenta ku esaki i mi no ta bai tur kaminda, sigur no riba tur ora di dia.” Cicilia ta bisa ku e no ta kana rònt deskuidá mas. “Semper mi ta warda mi kosnan bon, mi ta sera mi kas i mi outo na yabi.”
Hopi hende ta bisa ku kriminalidat ta subi tur kaminda, no na Boneiru so. Riba e isla por ripará esaki na e kambionan ku a tuma lugá den kurso di añanan. Por ehèmpel, tin un oumento di strañero kompará ku dies aña pasá. E progreso ekonómiko i yegada di kompania tambe ta hunga un ròl. “Boneiru a ekspandé riba diferente tereno”, Boy Yanga ta haña. “Pero e seguridat di e isla nò. Mester hasi algu na esaki.”
Edukashon
Ta remarkabel ku e siudadanonan hopi be ta menshoná edukashon na kas den relashon ku kriminalidat i e sintimentu di seguridat. “Nan mester siña no mishi ku kos di hende”, un señora mas grandi di edat ta bisa. “Hubentut djawendia tin un otro mentalidat. Ántes si e bisiña mira bo hasi malu, bo tin sigur ku b’a kue awa ora bo mama bini kas. Ta falta di e edukashon na kas ku e hobennan ta kue mal kaminda.”
Miembro di konseho insular Nolly Oleana (DP) ta boga pa un kampaña informativo pa mustra pueblo riba su propio responsabilidat. “Nos tur huntu ta responsabel pa seguridat general. Si bo mira algu sosodé ku ta ilegal, bo mester yama polis.”
Kuerpo di Polis di Hulanda Karibense internamente ta papia di e sintimentu di siudadano relashoná ku kriminalidat. Segun Rosales e sintimentu tin atenshon di polis. “Nos ta sali afó tambe ku notisia positivo manera e intenshon pa pone mas unifòrm di polis riba kaya. Tambe regularmente nos ta informá tokante prevenshon di kiebro.” Rosales: “Nos ke yega mas serka di pueblo pa huntu kombatí kriminalidat.”
Outor: Belkis Osepa