Giovanni Atalita, presidente di AVA Curaçao BV, minister Stanley Palm i chairman Olivier Arrindell di AVA Airways – potrèt: AVA
WILLEMSTAD – Kòrsou a haña un kompania di aviashon nobo: AVA Curaçao BV. E kompania di aviashon aki for di yüni mester bula riba dies diferente destinashon.
Si tur papel i pèrmit drenta na tempu, AVA Curaçao BV – un parti di AVA Airways na Jamaica – ta spera, promé ku Kampeonato Mundial di futbòl na Brazil, di por ofresé buelo direkto pa Rio de Janeiro, Fortaleza, Sao Paulo i Brasilia.
Presidente di AVA Curaçao BV Giovanni Atalita na palabra.
Idea
Ademas e kompania di aviashon ku kuater avion – Airbus 319 i 320 – ke bai ehekutá buelo direkto pa New York, Fort Lauderdale i Atlanta na Estádos Unídos, pa Jamaica, Haiti, Venezuela, Honduras i Sint Maarten. E otro destinashonnan chairman Olivier Arrindell di AVA Airways ta tene sekreto ainda pa no duna otro kompania lokal idea, asina el a bisa.
Si ta realista ku e kompania lo bula denter di sinku luna Arrindell no sa. “No lo bai purba, no ta imposibel. E plan a surgi tres aña pasá ora ku mi a bishitá tur pais na Merka Sentral i Suramérika. Tin konekshon sí di nort pa sùit pero no di ost pa wèst. Ta Korsou mester sirbi komo hub pa nos por ofresé e buelonan aki.”
Arrindell, yu di un tata yu di Kòrsou pero lantá na Haiti, añanan largu a traha komo consultant na un kompania di aviashon. “Pero si nan no sigui bo konseho ta bo mes mester hasié. Nos a investigá merkado tres aña largu, awor ta e momento pa bini ku AVA.”
Intrankilidat polítiko
Huntu ku presidente di AVA Airways, Roger Williams, Arrindell a bini Kòrsou riba petishon di Giovanni Atalita. “Mirando e intrankilidat polítiko nos a kere ku Kòrsou no ta kla ainda pa e plan aki, pero despues di nos bishita nos tin konfiansa. Kòrsou ta hasi tur loke ta posibel pa bai bèk na e promé kategoria di Federal Aviation Authority (FAA).”
Williams tin bon opinion di e isla karibense. “Geográfikamente, kulturalmente i polítikamente Kòrsou ta un lugá úniko pa organisá e ret aki den área karibense i Merka Latino. Último tres aña nos a hasi estudio ekstenso den e region a base di kua nos a skibi un businessplan, adaptá na nesesidatnan di e region.”
Buraku
Arrindell ta bisa ku nan no ta bai bula den e buraku ku un di e kompetidónan lokal. DAE, a laga atras despues ku nan a bai fayit. “Tin lugá pa sinku te seis kompania na Kòrsou. Nos a siña sí di DAE ku nos mester a drecha nos businessplan ainda. Pueblo ke servisio pa e plaka ku nan ta paga, i nos ta bai ofresé nan esaki. “AVA no ke kompetí ku e otro kompania di aviashon lokal Insel Air, Arrindell ta bisa. “Ta un kompania fenomenal ku nos no ke bringa; nos ke koperá ku nan.”
Ainda un kombersashon ku Insel Air no a tuma lugá. Sí a bishitá minister di Desaroyo Ekonómiko Stanley Palm i tabatin un enkuentro ku Kòrsou su Outoridat di Aviashon Sivil. Mas lat e siman aki a planeá un deliberashon ku minister di Tráfiko, Transpòrt i Planifikashon Espasial, Earl Balborda.
Palm a bisa ku e no tin un opinion ainda tokante e kompania di aviashon nobo, pasobra e ke investigá e kompania mas aleu. “Awé meinta m’a haña un presentashon di AVA. Ademas nan a entregá nan business plan na Curaçao Tourist Board (CTB), nos lo studia esei tambe.”
Outor: Anneke Polak