Ofisina di ZVK na Boneiru – potrèt: Belkis Osepa
KRALENDIJK – Dunamentu di kuido di ‘Zorgverzekeringskantoor’ (ZVK) pa loke ta trata mandamentu afó pa motibunan médiko na Boneiru mester por bai mas efisiente. E ofisina ta spera pa mitar di e aña akí di bini ku un mehoransa.
Un bes mas e ofisina ta haña krítika for di komunidat di Boneiru. Burokrasia i servisio según e pashèntnan eseinan ta bou di midí, pasobra e atendementu atministrativo ora ta manda pashènt afó pa motibunan médiko esei ta mará na hopi regla i papeleo.
Mas efisiente
Atseline Winklaar, konsehero atministrativo di ZVK, tin konosementu di e krítika. “Tur keho ku nos risibí via e komishon, nos ta tuma nan na serio. Nos ta hasi nos bèst pa hèndel esakinan na satisfakshon. Dor di e kehonan ei nos por drecha nos servisio.
Pregunta den ‘Kamer’
Minister Edith Schippers di: “Volksgezondheid, Welzijn en Sport” a haña e siman akí pregunta por eskrito di e miembronan di “Kamer Van Laar i Bouwmeester (tur dos di PvdA). Nan ta puntra Schippers kua ta e medidanan ku e ta bai tuma pa manda bèk e burokrasia i drecha e servisio.
Tambe funshonamentu di e Dunadó di Kuido kolombiano Coomeva ta ser kuestioná dor di ‘kamer’. Ademas Van Laar i Bouwmeester ta hasi pregunta di henter e organisashon di mandamentu afó pa motibu médiko, kualidat di e mandamentu afó i e satisfakshon pa kada isla.
ZVK a sòru pa 7671 mandamentu médiko afó for di Bonaire, Sint Eustatius i Saba. E pashèntnan a bai entre otro Aruba, Curaçao, Kolombia i Hulanda. Aña pasá e ofisina a haña 44 keho relashoná ku ‘fakturanan’ ku nan a manda aden pa Coomeva i e servisio di ZVK.
Keho sin base
Segun Winklaar tur e kehonan ku a drenta no ta tur tabatin base. Na Boneiru a drenta 29 keho di kua solamente 10 tabatin base. Shete tabata trata di servisio.
Na Statia nan a entregá 8 keho, di kua solamente 2 tabatin base. Sinku tabata trata di servisio. Di e shete kehonan na Saba te ainda ta ún a keda deklará ku e tin base i sobrá ta den tratamentu. Na Saba kuater keho tabata trata servisio di ZVK.
Tin keho riba e trayekto ku ta kana struf pa loke ta trata e atministrashon na ZVK. Pashèntnan mester pasa hopi wowo di kadena durante e trayekto di mandamentu afó pa trato médiko. E ofisina tin un sistema atministrativo outomatisá nobo den uso. Winklaar:”Nos ta spera ku na final di yüni nos a saka tur enfermedat infantil for di dje.”
Wowo di kadena importante
Segun Winklaar tin dos prosedura diferente ora ta trata di mandamentu pa motibunan médiko for di Boneiru. Un prosedura ta pa manda pashèntnan Aruba i Kòrsou i e otro ta pa Kolombia i Hulanda. “ Pa kada prosedura mester pasa dor di algun paso. Nos no ke hasié difísil pa e pashèntnan, pero kada wowo di e kadena ta importante pasobra ZVK ta keda responsabel pa e servisio i pa e finansanan.”
E promé parti di aña akí ZVK ta kaba di efektuá e investigashon di satisfakshon di kliente ku a kuminsá aña pasá. A aserká tur pashènt ku a bai pa motibunan médiko Kolombia i Guadaloupe.
ZVK ta hasi un yamamentu na pashèntnan pa nan mèldu. “Nos sa tende hopi bes via medianan ku tin keho. Si nos sa kiko e kehonan ta nos por sigui drecha ku yudansa di e pashèntnan e servisio”, di akuerdo ku Winklaar.
Outor Belkis Osepa