Rafael Santana i Hans Els
KRALENDIJK – Koalishon di Boneiru ta tambaleá despues di un kiebro di konfiansa entre Union Patriótiko Boneriano (UPB) i Frakshon Santana.
Rafael Santana, e úniko miembro di konseho insular di Frakshon Santana, a yama djabièrnè anochi huntu ku su diputado Hans Els un konferensia di prensa ku urgensia pa ekspresá nan malkontentu tokante e relashon ku UPB.
Pa basta tempu tin deskordia denter di koalishon. Siman pasá e dos partidonan tabata den klinch ku otro tokante e tempu pa tene un referendum konstitushonal riba futuro di Boneiru.
WEB
Djabièrnè 14 di febrüari e hèmber a yena te pasa over serka Santana i Els. Durante un importante reunión di grupo di trabou ku representante di Hulanda, Saba i Statia tokante kuido di salubridat, Els a hañ’é ku un dokumento di dos página prosedente di UPB ku e mester a firma inmediatamente. Tabata trata di un dokumento pa kaba di krak e defensa rondó di e rapòrt di investigashon tokante mal gobernashon durante privatisashon di e kompania Water- en Energiebedrijf Bonaire (WEB). Tabatin purá pasobra otro siman lo a papia tokante e rapòrt di investigashon den ‘Tweede Kamer’.
Els: “Mi a nenga di firma direktamente sin hiba konosementu di e kontenido i profundisá mi mes den dje. Despues mi a haña sa ku ta un abogado a traha e dokumento ku tabata konsistí di 46 blachi, miéntras ku mi a haña solamente 2 blachi pa mi mira. Esei ta manipulashon.”
Nibud
Mesun dia UPB a violá otro palabrashon ku Frakshon Santana dor di publiká sifra di e sumanan mensual ku un kantidat di situashon di famia mester tin na entrada. E investigashon di Nibud di Hulanda ku a keda hasí riba enkargo di gobièrnu insular, ta mustra klaramente ku bonerianonan ta bibando hopi bou di nan nivel di entrada.
Oposishon tin simannan largu ta pidi sifra. Els ta splika durante e konferensia di prensa ku el a palabrá ku representante di Reino Wilbert Stolte i ku lider di UPB James Kroon ku pa e momentonan akí lo no trese e sifranan akí dilanti. Esaki lo sosodé ora e rapòrt keda tratá ku bestuurscollege i ku konseho insular. Tras di su lomba èks-diputado Burney Elhage a laga publiká e sifranan dor di departamento di Komunikashon di e Kuerpo Públiko Boneiru, di akuerdo ku Els.
“E komunikado di prensa no ta aprobá”, asina Els ta bisa. “El Hage dos bes tras di mi lomba a saka un komunikado di prensa, mientras ku e investigashon di Nibud tabata bou di embarbo. No ta asina bo ta trata ku bo partner di koalishon. Asina no tin konfiansa.”
Santana no ta indiká klaramente kiko e kiebro di relashon ta nifiká. “Nos no ta keda tratá ku rèspèt i ta violá palabrashonnan denter di koalishon. Nos no por laga esaki sosodé.” Santana ta terminá ku e palabranan ku“e porta a sera, pero no tin kandal riba dje. Tin un gobièrnu i un koalishon, pero tur kos por sosodé, pasobra nos no ta manipulabel.”
Outor Belkis Osepa