E kámaranan ainda no ta graba 24 ora pa dia
WILLEMSTAD – Diesdos kámara repartí den Punda ta vigilá bishitantenan di siudat. Ke-chi Chang di Curaçao Surveillance Services ya ta trahando pa dies aña riba un sistema di siguridat den sentro di siudat i su plan ta tumando dia pa dia mas forma.
Ku e imágennan di e kámaranan, téknikamente mirá kaba lo por kohe ‘malechornan’. “Nos tambe por i tin mag di usa nan”, asina bosero di Ministerio Públiko Norman Serphos ta konta. Turista òf hende lokal ku ta bishitá Punda no ta wòrdu poné na altura di e kámaranan.
Elisa Koek ta papia ku Norman Serphos
Un pareha merikano ku ta ku fakansi na Kòrsou no ta haña esaki ningun problema. “Mi no a ferwagt nada otro”, e dama di 38 aña ta bisa. “Na lugánan drùk kaminda tin hopi pakus i establesimentu di horeca, esaki ta masha normal. Pa loke ta trata konsepto merikano esaki si ta en todo kaso.”
Nada di skonde
Tambe un grupo di hóben di Kòrsou ta positivo tokante e kámaranan.”Mi no tin nada di skonde”, asina un mucha hòmber di diesnuebe aña ta bisa, miéntras e ta kita demostrativamente su kamisa den direkshon di e kámara fiktisio. “Nan por mira trankil loke nos ta hasiendo, solamente mi ta spera ku mi mama no ta mira.” Su amiga di diesocho aña ta kontentu ku e kámaranan. “Mi ta sinti mi mas seif pa kana rònt anochi, awor ku mi sa ku tin kámara kologá.”
Un dama mas bieu ku ta kumprando kos, ta haña ku mester mustra klaramente kaminda e kámaranan ta kologá. “Mi ta kontentu ku e desaroyo, pero ora e kámaranan ta ser usá di bèrdat lo mester informá nos di esei. Di otro forma mi ta haña un sentimentu straño, manera ku lo tin otro intenshonsu tras.”
Seguridat
Serphos ta mira e kámaranan komo un desaroyo positivo. “Na Amsterdam, Rotterdam òf New York ya pa añanan ta filmando hende den siudat pa oumentá seguridat. Nos ta traha na MP tambe ya pa basta tempu ku imágen: mira e asesinato riba Helmin Wiels òf e asesinato dòbel riba e pareha chines. Tur kaminda ei banda nos a pidi pa manda imágen i mayoria bes nos ta haña tambe.”
PAIS ta e partido polítiko ku anteriormente a hasi pregunta tokante protekshon di privasidat riba e isla. Segun kolaboradó di frakshon Nathalie Samson-Coffie e kámaranan no tin nada di haber ku protekshon di seguridat. “E lei di privasidat ta drei rondó di derechi penal. Asuntu manera kámara ta pará den kódigo di derechi penal.” Samson-Coffie sí ta asombrá ku ya e kámaranan ta den sentro di siudat. “Según e kódigo hende lo mester keda atvertí i esaki no ta e kaso. PAIS sigur no ta kontra kámara, pero mester regla esaki na e manera korekto.”
Number di outo
E diesdos kámaranan den Punda ainda no ta graba 24 ora pa dia. Si ta na Chang finalmente esaki si lo mester bai sosodé. “Nos ta den pleno kombersashon ku gobièrnu. Ofisialmente nos no a kuminsá ainda ku nada.” Kuantu e kámaranan ta graba ta un sekretu ku e ta tene pa su mes. “Mi no ke duna atrakadónan chèns pa kalkulá kuantu tempu nan lo por tin. Loke sí mi por bisa ta ku tabatin bastante tempu pa haña imagen di e resiente atrakadónan di Freeport Jewelers. Ademas e kámaranan ta señalá i registrá plachi di number di outo. ”
Outor Elisa Koek