Minister di Salubridat, Ben Whiteman inspektor general suplente di Inspekshon di Salubridat Joe Alcalá i èks inspektor di salubridat Michael Mourillon
WILLEMSTAD – Na ougùstùs di 2010, Cedric mester a operá pa kita un tumor maligno. Komo resultado di e operashon, Cedric tin tres aña kaba ta biba ku problema di stoma i un inflamashon króniko di pánkreas. E ku su kasá Sasja a entregá un keho na Inspekshon di Salubridat, pasobra nan ta konvensí ku e operashon no a bai manera mester ta.
No ta hasiendo nada ku e keho. Nan tin gana di sa kon nan ta pará, pero komo Inspekshon falta personal, i pa kolmo e funshon di Inspektor di Salubridat no ta yená ainda, e pareha a tende ku, pa awor, e keho tin ku keda pendiente.
Despues di e operashon, Cedric tabatin problema ku digestion debí na e struktura gastrointestinal ku nan a traha p’e, i a resultá ku nan a kita parti di su pánkreas tambe. E tin hopi doló i a pèrdè trinta kilo.
Pánkreas
Na novèmber di 2010, e pareha a bai Colombia pa konseho i despues Cuba tambe. Aya nan a tende ku nan a kita garganta di su pánkreas. Den su rapòrt na Inspekshon, di 7 di mart 2013, Patrick Fa Si Oen di Sehos, e siruhano ku a operá Cedric, ta pretendé ku el a informá e pashènt al respekto. Segun Cedric i su kasá, dia nan a bai Colombia, mas di tres luna despues di e operashon, ainda nan no tabata sa nada di e pida pánkreas ku a kita. Den e rapòrtnan ku Sehos a manda pa e dòkter di kas tampoko no tin pará nada tokante e berdadero embergadura di e operashon.
Despues di e operashon, Cedric tabatin ku drenta hospital na vários okashon debí ku su stoma tabata lèk. E no ta den kondishon pa hasi su trabou mas. Te asina leu, via su seguro di trabou e tratamentu den eksterior ta kubrí, pero esei tambe por para, pasobra tin chèns ku lo kùr e af pa su trabou. E gastunan ta sigui akumulá. “Nos a haña nos ta kumpra kama spesial”, Sasja ta konta. Anochi e no por drumi plat, pasobra komo resultado di e operashon e ta respu konstantemente, anto den dia tin un holó desagradabel ta bini ariba for di su tripa. “Mi tin bèrgwensa”, e hòmber ta bisa ku stèm abou.
Su estilo di bida a kambia drástikamente despues di e operashon. “E pregunta ku nos ta sintá kuné ta, pakiko nan a lag’é ku un struktura asina straño na su stoma i tripa”, Sasja ta bisa. “E dòkternan na Colombia i Cuba no por a kaba di komprondé kiko nan ta mira.”
Drumí
Na febrüari di aña pasá, Jan Huurman, e tempu ei inspektor di salubridat, a kuminsá atendé nan keho. Pero despues ku el a bai, e fail a keda drumi. “Nos a bishitá Inspekshon resientemente, pero sin a saka masha kos afó. Despues ku Huurman a bai, niun hende mas no a tira bista riba nos keho i Inspekshon ta bisa ku nan no por bisa tampoko ki dia un hende lo kuminsá traha riba dje. A konsehá nos entamá un kaso sivil”, e pareha ta bisa.
Joe Alcalá, inspektor general suplente di Inspekshon di Salubridat, ta rekonosé ku nan hopi atrasá ku tratamentu di e kaso. “Nos ta registrá keho nobo i ta purba atendé esunnan pendiente. Ainda e proseso di selekshon di un inspektor nobo pa Servisio di Salubridat ta andando.” E ta rekonosé ku un kaso sivil ta un paso lógiko pa e pashèntnan. “Un proseso disiplinario médiko no ta resultá den un pago di daño i perhuisio. Un siruhano por risibí un amonestashon i e tin ku paga un but, pero ta den kaha di gobièrnu e sèn ei ta bai.”
Ketu
Aktual minister di Salubridat, Ben Whiteman, no ke reakshoná riba e situashon aktual di Inspekshon. E mes a yega di traha pa basta aña na Inspekshon, i a buska Jan Huurman for di Hulanda pa asistí Inspekshon for di kuminsamentu di su periodo komo minister. Pero for di momento ku a keda sin renobá kontrato di Huurman su susesor, Michael Mourillon, kos a bira ketu na departamento di Inspekshon di Salubridat.
Pa protehá nan privasidat, a kambia nòmber di e pareha
Outor: Leoni Leidel-Schenk