Hubert ‘Iby’ Statie – potrèt: Belkis Osepa
KRALENDIJK – Kuerpo Polisial di Karibe Hulandes ke kontakto mas estrecho ku habitantenan dje tres islanan Boneiru, Saba i Statia. Pa logra esaki e kuerpo ta hasi uso algun aña kaba di polis di bario. Hubert ‘Iby’ Statie ta polis di bario di Rincon.
Iby Statie (53) sa kiko ta pasa den Rincon. E konosé e habitantenan i organisashonnan den e bario. Ya pa bintinuebe aña kaba e ta polis i for di 101010 e ta e polis di bario kaminda tur hende dje bario por akudí serka dje.
Kontakto direkto
Statie: “E tarea mas prinsipal ta e kontakto direkto ku bo tin ku e siudadanonan den bario. E polisnan ku ta patruya ta solushoná un problema na e momentu ei. Nan ta tuna datos i sigui ku patruya. Nos komo polis di bario ta wak detaye i kon pa solushoná problema a largo plaso. Nos ta wak e doló di hende dje bario di aserka.”
Di akuerdo ku Statie Rincon tin hopi molèster di bendementu di droga i muchanan menor di edat ku komportashon seksual indeseá i keda lat riba kaya sin kontrol. “Nos ta kuminsá serka e mayornan i atendé nan seriamente pa mustra nan riba nan responsabilidat. E muchanan no por ta riba kaya e oranan lat di anochi ei.”
Muchanan
Iby Statia ta duna muchanan na Rincon atenshon speshal. Regular nan ta haña informashon di diferente tópiko. Resientemente Iby Statie a bishitá Watapanaschool i a papia ku e muchanan tokante reglanan den tráfiko.
Outor: Belkis Osepa