punda-handelskade

WILLEMSTAD – Na aña 2013 mas ku 440.000 turista a pasa por lo ménos un anochi na Kòrsou, asina sifra di Curaçao Tourist Board (CTB) ta mustra. Esaki ta sinku porshento mas ku na 2012: turismo na Kòrsou ainda ta oumentá tur aña.

 
Tòg mayoria di e hotèlnan ta mira e kantidat di kamberbashí oumentá ketu bai. “Mas i mas hende ta buska akomodashon mas chikí i mas barata online”, Margie Zoetrum, manager di komunikashon na CTB, ta bisa.

 
Un bishita na e website di biahe AirBnb pa buska akomodashon na Kòrsou ta ta konfirmá e trènt aki: ta ofresé kamber den hòstel of apartamentu chikí for di 20 euro pa anochi (mas o ménos 50 florin), pero por buk tambe un kas hinté òf solamente un kamber den un kas.

 
Kamber sushi
“Tin desena di ehèmpel, Sander Winterberg, general manager na Livingstone Jan Thiel, ta konta. “Tin be ta trata di un apartamento nèchi den un resort, pero tin be turista ta bin resultá den un kamber sushi den un mal bario. Mi ta haña esei piká di nan eksperiensia: e hendenan aki no ta bin Kòrsou bèk nunka mas. Ademas ta paga e impuesto na Hulanda, ke men Kòrsou mes no ta probechá.”

 
José Castillo, sales director na Marriott, tambe ta ripará e trènt. “E kasnan den mi bario ta hür kasi tur siman kaminda 2013 pa Marriott sigur no tabata un bon aña. Mi no tin un idea unda e plaka ku a paga pa un kas privá ta keda.”

 
CTB ta midi e kantidat di turista ku e karchi di imigrashon ku e hendenan ku yega na Hato ta entregá. Asina CBT ta mira ku turismo ta oumentá si. “Mas i mas ta sosodé ku ta yena un adrès di un kas di biba riba e karchi aki”, Zoetrum ta konta.

 
Kùr
CTB por kùr e adresnan aki. “Tin be e akomodashonnan chikitu ta haña inspekshon i nan mester kumpli ku sierto kriterio. Si esaki ta bon nos ta promové nan riba nos site tambe. Nan tambe meresé algu i e plaka ta keda den ekonomia di Kòrsou ketu bai. E turista aki kisas ta saka ménos plaka na hotèl, pero e ta bai supermerkado si, òf e ta hür un outo i e ta kumpra algu na Punda.” Zoetrum no por bisa si ta hür tur akomodashon legalmente. “Esaki ta na gobièrnu. Si un hende no ta paga impuesto pa hür un apartamento, esaki ta ilegal.”

 
For di algun aña CBT aktivamente ta promové Kòrsou den Estádos Unídos, pero Alemania i Suramerika tambe ta haña mas atenshon. No ta promové Kòrsou komo un isla pa un sièrto grupo. “Pa kua grupo nos ta hasi promoshon esei ta dependé di e parti di mundu. Na Hulanda nos ta dirigí e promoshon riba famia, pero na Suramerika e promoshon ta mas pa ‘shopaholic’. Despues ku nos bende e destinashon ta na e turista pa buska e hotel ku ta pas seka dje. Ta e hotelnan mester trata di aktua den esaki.”

 
Merkado mas amplio
Marriott ta dirigí su mes espesialmente riba merkado merikano. Castillo ta masha kontentu ku e promoshon di CTB na Estádos Unídos. Pero Livingstone semper tabata buska e turista hulandes. “E aña aki nos a kuminsá fókùs riba un merkado mas amplio”, Winterberg ta konta. Awor nos ta dirigí nos mes tambe riba turista di Sürnam, Brazil, i Estádos Unídos. Na yanüari kaba esaki a yuda.”

 
Outor: Elisa Koek