Aedis aegypti ta transmití Chikungunya i Dengue
PHILIPSBURG – Jeff Berger, doño di JMB Communications na Massachusetts i editor di e notisiero elektróniko influyente St. Maarten Weekly News, e siman aki a ekspresá kritika severo riba e manera ku gobièrnu na Sint Maarten ta trata e krísis di chikungunya.
Berger ta premirá ku turismo lo bai hopi atras na mart pasobra gobièrnu a keda sin kontradesí notisianan eksagerá na Estádos Unídos i Canada. Berger ta ferwagt ku ‘miles di turista’ lo keda sin bini pa miedu di kontamishon ku e virùs.
Berger ta atribuí e situashon na un falta di aktividat di relashonnan públiko planeá, strukturá i positivo den medionan di komunikashon merikano i kanades. “Pa animá pueblo pa tuma medidanan preventivo tin efekto solamente riba e isla. E problema mas grandi ta di kontradesí e mal informashon ku tin fo’i tera. Parse manera e isla no ta hasi nada na esaki”,segun Berger den su notisiero.
Pániko pa biaha
Ademas Berger ta bisa ku konseho di biahe engañoso i negativo di parti di gobièrnonan den estado merikano i na Canada ‘a kousa un sierto sintimento di pániko pa biaha espesialmente serka doño di timeshare di edat mas avansá.’
Tambe Berger a ekspresá krítika riba e organisashon di seguro sosial SZV ku pa medio di un sms ta saka un aviso ku chikungunya ta menasá bida. “Chikungunya no ta trese peliger di morto niun ora so”, Berger ta skibi.
200 mil lesadó
Mas o ménos 200 mil lesadó merikano i kanades ku interes pa e isla ta lesa e notisiero St. Maarten Weekly News. Ministerio di Salubridat Públiko ainda no a reakshoná riba e krítika.
Outor: Hilbert Haar