Malvina Cecilia
WILLEMSTAD – Komo alternativa pa Usona i Amfo a lanta e fundashon Fondo pa Deporte i Responsabilidat Sosial (FDRS), pa kua minister di Finansa José Jardim mester responsabilisá su mes mayan atardi den Staten.
Asina Malvina Cecilia, ku ta konsiderá komo lider di e proyekto, ta laga sa. Amfo (Antilliaanse Medefinancierings Organisatie) entretantu a stòp di duna supsidio na proyekto na Kòrsou. Usona, e organisashon di ehekutashon di Stichting Ontwikkeling Nederlandse Antillen (Fundashon Desaroyo Antia) fin di e aña aki tambe lo stòp.
Alternativa
“Gobièrnu sa ku mester bini un alternativa, i nos ta e alternativa ei. Si gobièrnu ke pa ofishalmente nos bira un remplaso, nos lo hasi esaki ku hopi plaser”, asina Cecilia ta bisa.
Pero FDRS, ku tin komo meta pa redusí pobresa den barionan ku stimulashon di hobennan, no tabatin un start masha fortuná. Promé ku a lanta e fundashon, ya kaba tabatin pregunta tokante e echo ku a gasta 500 mil florin.
Gastu
Statenlid independiente Omayra Leeflang for di prinsipio tabatin krítika riba FDRS. E ta sinti su mes sostené pa e rapòrt ku a sali poko tempu ei di e ofisina di accountant di gobièrnu Soab. Asina segun Leeflang tabatin gastu di 157 mil florin sin ku a lanta FDRS statutariamente òf a inskribi FDRS na Kamer van Koophandel. Lo a duna 500 mil florin na supsidio sin ku a gasta nada di esaki na e meta efektivo di e fundashon.
Ademas e miembro di oposishon ta repudiá e echo ku kontra di boluntat di direktiva a kumpra un di dos outo, asina ta sali for di e rapòrt. A hasi adaptashon na e ‘ofisina inkreiblemente karu’ ku un hür di 72 mil florin pa aña, e miembro di opsishon ta bisa. “E gastunan di overhead ta eksorbitante. Asina den tres luna a paga 52 mil florin na salario. Anualmente esaki ta 208 mil florin, huntu ku e 72 mil di e hür a gasta un terser parti di e supsidio na salario i hür.
Transpòrt
Tambe Leeflang ta bisa ku ta dudoso ku a gasta 23 mil florin na transpòrt den tres luna. “Den un pais kaminda un taksi ta e medio di transpòrt di mas karu. Ta parse mi ku a paga pa ticket pa bula bai bini den business class, mi no sa pa bai unda.”
Anteriormente kaba Leeflang a denunsiá Malvina Cecilia. Inhustamente lo el a yama su mes direktor di e fundashon, inhustamente lo el a yama su mes lider di e proyekto i a aktuá komo trahado di maneho na Financiën despues ku e no tabatin e funshon aki mas. “Pero el a firma dokumento komo direktor sí, komo lider el a nombra hende, e tabata manipulativo.”, asina Leeflang ta bisa.
Durante di e reunion di Staten Leeflang lo no konformá su mes ku un eventual redukshon di e gastunan. Mañan oposishon lo entregá un moshon di deskonfiansa kontra minister di Finansa José Jardim, ku Leeflang lo sostené.
Reprochabel
“Algu a faya fundamentalmente. E minister ta reprochabel i e mes lo mester saka su konklushonnan. Aparentemente e fundashon no ta kapas di kumpli ku su propio meta”, Leeflang ta bisa. “E maneho a kita bai, a gasta mei mion florin i minister no tin nada di bisa tokante e fundashon pasobra ta trata di un fundashon privá. E relashon entre gobièrnu i e fundashon aki mester para, e plaka ku a gasta ilegalmente mester bini bèk.”
Minister Jardim último dianan no tabata alkansabel pa komentario
Outor: Anneke Polak