Gezaghèber Lydia Emerencia ku poster Stop Abuso - potrèt Belkis Osepa

Gezaghèber Lydia Emerencia ku poster Stop Abuso – potrèt Belkis Osepa

KRALENDIJK – Fundashon Respetá Mucha (FRM) a lansa su promé kampaña pa stop abusu di mucha. E kampaña ta pa konsientisá pueblo di Boneiru riba e tereno aki, segun presidente Desiree Croes di FRM.

 
Gezaghèber Lydia Emerencia i diputado Hans Els a desvelá djarason 26 di febrüari dos poster ku ta bisa: ‘habri wowo stòp abusu di mucha’ i e otro ‘no tapa kara stòp abusu di mucha’. Croes: “E posternan i tambe bèner lo ta visibel na paradanan di bùs i kaminda hopi hende ta trafiká. Tambe nos tin steker pa bumper di outo. Mester ta klaro ku no mester tarda mas pa konsientisá kontra abusu di mucha”.

Belkis Osepa papia ku presidente Desiree Croes di FRM

Tayer
Fundashon Respetá Mucha a lanta aña pasá òktober i aparte di konsientisashon nan tin komo meta tambe pa duna tayer na organisashonnan i instanshanan ku ta traha riba e tereno di mucha i famia. E intenshon ta pa siña otro kon pa rekonosé abusu di mucha. Tambe FRM ke introdusí den futuro un telefòn pa mucha.
Gezaghèber Lydia Emerenci a enfatisá ku mucha ta e ser humanonan mas vulnerabel di un komunidat i ta un lástima ku komunidat no por dil ku e ser ku ta mucha. “Asina natural ku e mucha ta, asina difísil ta pa biba ku mucha na un manera responsabel i saludabel. Muchanan ta esensia di nos komunidat, pero tòg komunidat no ta trata nan korekto.

Shake up
Emerencia a nombra diferente manera kaminda ta trata mucha no korekto. Por ehèmpel: abusu di mucha, sklabitut di mucha, pòrno di mucha i labor di mucha. “Nos tin difikultat pa anda ku mucha.” Emerencia ta aploudí e inisiativa di FRM ku di un manera impaktante ta eksihí atenshon pa abusu di mucha. “Mester shake up komunidat pasobra abusu di mucha ta inaseptabel.”

Diputado Hans Els a bisa ku gobièrnu tin atenshon pa mucha den komunidat i ta tumando pasonan pa kuida mucha. “Pero nos mester hasi mas. Nos mester papia di henter e grupo di mucha i hóben di 0 te 12 aña, pasobra ta nan ta nos siudadanonan di futuro. FRM a lanta pasobra tin un nesesidat. E kampaña ta un komienso di konsientisashon.”

Belkis Osepa