KRALENDIJK – Un moshon ku a aseptá unánimamente den konseho insular di Boneiru ta sostené e inisiativanan ku a tuma kaba pa organisashon di un referèndem konstitushonal riba e isla.
Konseho insular ta bai aserká Nashonnan Uní ofishalmente pa pone e isla riba lista di ‘Non-Self-Governing Territories’ di Nashonnan Uní (NU). Ademas e konseho a didsidí ku un komishon di preparashon lo konsehá konseho insular den kuater siman tokante organisashon di un referèndem konforme resolushon 1541 di NU.
Ta Nòchi Willem a tuma inisiativa pa e diálogo polítiko tokante e referèndem. E ta papia di un apertura. “E moshon aki ke men ku ta skucha e demanda di pueblo. Ademas ta un konfirmashon ku e státùs aktual di Boneiru no ta funshoná, sin tira falta den un sierto direkshon.”
E komishon ta bai studia strategia, timing i kontenido di e referèndem. Ta konseho insular mester tuma e desishon final.
Presidente James Finies di fundashon Nos Ke Boneiru Bèk ta aploudí e pronunsiamentunan resien di e dignitarionan hulandes. Esakinan ta indiká ku islanan BES tin derecho riba outodeterminashon. Despues di sigur dos aña Hulanda a kambia su posishon ofishalmente, segun Finies. “Minister Ronald Plasterk na yanüari a deklará ku pueblo tin derecho di laga tende nan bos i ku e derecho riba outodeterminashon ta un logro ku no por diskutí. Sekretario-general Richard van Zwol tambe a ripití e pronunsiamentu aki kuminsamentu di e siman aki durante un bishita di trabou.”
Finies ta haña ku Hulanda definitivamente a habri porta bèk i lo no stroba Boneiru den e tumamentu di desishon. “Awor ta na nos mes pa uni i imponé kambio.”
Outor: Belkis Osepa