Minister di Salubridat Ben Whiteman, inspektor –general suplente di Inspekshon di Salubridat Joe Alcala i èks inspektor di Salubridat Michael Mourillon
WILLEMSTAD – Raylison Martina i Lisette van Tatenhove atrobe a manda un karta urgente pa Inspekshon di Salubridat Públiko i Minister di Salubridat Ben Whiteman. Martina i Van Tatenhove tur dos a entregá un keho seka Inspekshon, ku despues di un aña ainda no a trata.
Na aprel di aña pasá kaba Martina i Van Tatenhove a manda un karta urgente, despues ku no a prolongá e kòntrakt di èks inspektor Jan Huurman. Nan tabata teme ku sin Huurman, lo no trata e kehonan. Inspektor-general suplente Joe Alcalá poko tempu pasá a atmití ku en berdat ta keda sin trata keho awor ku e funshon di Inspektor di Salubridat ta vakante atrobe.
Martina i Van Tatenhove nunka no a haña kontesta riba nan promé karta. E tempu ei Whiteman a laga sa via medionan di komunikashon ku e ta haña e karta inoportuno i ku no tin nodi di tin prekupá pa inspekshon di salubridat. Martina i Van Tatenhove tin tiki konfiansa ku lo trata nan keho denter di poko, sin bista riba presensia di un inspektor òf inspektor athunto. “Un inspekshon sin inpektor no tin niun sentido”, nan ta skibi.
Lèkmentu di hal
Van Tatenhove ta deskribí den e karta kon su operashon na 2009, pa saka su halblas, a bai kompletamente malu. “A resultá ku mi tabatin lèkmentu, liternan di hal tabata kore drenta mi barika i m’a haña peritonitis (inflamashon di flishi di barika, red.). A disidí di manda mi Venezuela i despues Hulanda, pa un serie di operashon pa para e lèkmentu di hal i e konsekuenshanan of porloménos limitá nan. Par’un pinga lo m’a muri.”
Operashon pa hasi stoma mas chikí
Martina ta papia pa su tata ku a muri di komplikashon severo despues di un operashon pa hasi stoma mas chikí. Na febrüari e inspektor di e tempu ei, Jan Huurman, a para e operashonnan aki. Poko tempu pasá hòspital mes a bini ku un propio investigashon ku lo a mustra ku e operashonnan ta seif tòg, pero ainda inspekshon mester start nan propio investigashon di e operashonnan pa hasi stoma mas chikí ku tabatin sinku víktima mortal.
FWG
Fin di aña pasá FWG a trese e “Trendrapport Caribisch gebied 2013, Monitor op ontwikkelingen in de gezondheidszorg”. Segun èks inspektor Huurman a keda sin deskribí e problemanan klave den kuido médiko na Kòrsou den e rapòrt pasobra a skohe mandatario i gobernante den kuido pa duna informashon. “Niun di esnan ku a entrevistá tabatin ni tin niun sorto di interes den un konsiderashon krítiko.”
Falta di e detayenan fini nesesario segun Huurman ta sali mésora den e spesialismo di siruhia. “Tin siruhano di kalidat inkontroversial, tin otro ku meresé menos balorashon. Espesialmente e siruhanonan ku tabata envolví den e tantísimo komplikashonnan despues di operashon pa hasi stoma mas chikí i e froude tambe relatá na esaki”, Huurman ta skibi. A hasi denunsio di esaki na Ministerio Públiko i a entregá diferente keho na e Kolegio Disipinario Médiko, pero ainda nada no a sali for di esaki.
Huurman: “Segun mi salubridat publiko ta e sektor pa ekselensia kaminda e diferenshanan grandi den poder na Hulanda Karibense ta sali. Hulanda Oropeo no mester kita kara wak otro banda mas.”
Martina i Van Tatenhove ta insistí seka Alcalá i Whiteman pa laga Inspekshon ehekutá su tareanan legal manera debe ser. Lo manda e karta pa tur miembro di Staten pa nan por pone preshon riba e minister.
Lesa tradukshon na papiamentu di e karta urgente aki.
Outor: Leoni Leidel-Schenk