Kursista di Trayekto Sosial Formativo ta kuminsá nan marcha largu – Potrèt: Informashon Defensa
WILLEMSTAD – “Mi tabata málamucha, mi tabata bende droga. M’a mira kon mi tata por a ‘traha plaka lihé’, esei mi tambe tabata ke. Pero mi a realisá bon bon ku esei no tabata e bida ku mi tabata ke.” Korporal Henriquez na palabra. Na kazèrne di marinir na Suffisant e ta guia hóben ku ta sigui e trayekto di Formashon Sosial (SVT). E hóbennan aki tambe ta hopi málamucha, pero bon mirá, meskos ku nan korporal nan ta buskando e bida drechi.
Henriquez tin apénas 21 aña i e ta un alumno rápido. Ménos ku tres aña pasá e mes a drenta, basta inmanehabel. Hopi hóben ku mèldu mester detoksiká promé, pero Henriquez no tabata usa droga. “Dje bobo ei mi no tabata. Mi tin bon kabes i mi por siña bon.”
Henriquez – den kazerne ta yama tur hende na nan fam – den tres aña ta kaba e SVT, i mésora ta sigui pa e estudio pa milisia di Kòrsou i despues di esei ku éksito ta sigui e estudio pa korporal. Tres siman pasá Henriquez a kuminsá ku su funshon nobo di bakmeester (korporal na marina) E ta guia 35 hóben. E hóbennan aki, despues di un temporada di selekshon di sinku luna, a kuminsá ku SVT.
Enfoke militar
“Ta un selekshon masha intensivo, kaminda ta tèst e hóbennan físikamente i sikológikamente.”, e Hefe di Estudio Anton van den Berg, mèntòr di SVT, ta konta. “Nan ta haña nan ku dinámismo di grupo i peso físiko. Nos no ta hasi nan militar, pero nos ta usa e enfoke militar pa asina haña un kambio di komportashon.”
E hóbennan no por tin komportashon kriminal seis luna largu i nan mester ta limpi di uso di droga; Fundashon di Maneho di Adikshon ta tèst nan delantá. Tòg den e promé simannan algu sa bai robes. “No ta pòrnada e hóbennan aki t’aki. Nan ta hòrta di otro, nan ta gaña, nan bròdernan ta tira sakitu di droga paden. Pa nos ta un reto pa kambia nan, ke men si tin un insidente nos ta wak kon nos por solushoná esaki. Pero si un hóben no ke siña, afó kuné.”
Mustra rèspèt.
Di e 36 hóbennan tin sinku ku un nivel masha abou di traha i pensa, shete ku ainda tin problema ku droga, i sinku hóben ku problema di agreshon ku ta pió ku serka e otronan.”Den kuminsamentu mester a kustumbrá hopi. Mi tabatin difikultat ora ku den e promé dianan na no tabata sa di duna rèspèt”, Henriquez ta kionta. Pero despues ku a kamper un siman durante e bivak i pasa dos siman den kazèrne kos ta bai bon. “Un kursista a bin para mi dilanti i wak mi den mi wowonan. E ker a provoká, pasobra mi ta mas hóben kuné. M’a bis’é: ‘Abo ta mas bieu ku mi pero wak unda ami ta i unda abo ta.’ Pa hopi hóben awor ami ta un ehèmpel.”
Orguyoso
Van den Berg ta orguyoso, pasobra Henriquez ta e ehèmpel típiko di loke SVT por hasi pa hóben “Ta un chèns úniko i hopi be tambe e úniko chèns pa e hóbennan aki por logra algu den nan bida. Henriquez ta mi orguyo, m’a mir’é drenta. Si mi mira kon e ta funshoná awor, esei ta hasi mi kontentu.”
No ta solamente Van den Berg ta orguyoso di su alumno, mama i ruman hòmber di Henriquez tambe, su wela i asta su tata, ku e ta biba seka dje. I Henriquez di su banda ta orguyoso di su tata. “Mi tata tambe a stòp su aktividatnan riba kaya. E ta buskando trabou i probablemente lo bai traha na Isla.”
Mayan kapítulo 2: Trayekto di Formashon Sosial ta trabou na midí.
Outor: Anneke Polak