Lydia Emerencia ta tuma despedida komo gezaghebber di Boneiru – potrèt: Belkis Osepa.
KRALENDIJK – Kasi e no por imaginá ku e por a aktua otro for di e manera ku el a aktua durante su funshon di gezaghebber di Boneiru. Pa Lydia Emerencia e funshon di gezaghebber a kaba, maske kon kòrtiku el a traha komo tal. “Den dos aña e konfiansa a kibra, mientras ku ta djis mi trabou mi tabata hasi. Lo mi no ker a ni yam’é kurashi.
Destinu a disidí ku ta dos aña so el a keda gezaghebber, asina e mes ta bisa. For di awe, 1 mart 2014, Emerencia no ta gezaghebber mas. Lo e keda biba na Boneiru por lo ménos seis luna mas i lo hasi trabou di boluntario wardando un trabou nobo. No ta sigur ainda ku despues e lo keda biba na Boneiru òf si e ta bai Aruba bèk òf Hulanda.
Kurashi
Lydia Emerencia ta papia di hopi momento difísil den e último dos añanan. El a kuestioná si tabatin bon gobernashon i integridat na Boneiru, dikta un ordu di emergensia kontra WEB i a hasi denunsia den kaso di un pèrmit di taxi iregular ku a duna, kaminda un diputado tabata involukrá estrechamente. “Lo mi no a yam’é kurashi. Ta djis mi trabou mi a hasi. E desishonnan no ta duel mi, pasobra a tuma nan a base di e informashon ku mi tabatin i a base di e manera ku mi a kalkulá, analisá i evaluá.
Emerencia ta klaro tokante su retiro. “Un gezaghebber no por funshoná si tin un moshon di deskonfiansa. Tabata un ekspreshon ku no tin boluntat pa traha ku mi. E ora ei a kaba. Tin prinsipio manera hustisia i sinseridat ku nunka mi no lo nenga. No tabata trata di diferensha di opinion, maske kon duru nos tabata grita. Mi por wanta un stòrm i semper mi a traha den prosesonan di kambio. Pero na un dado momentu e honestidat a bira hopi frágil.
Opstrukshon
Emerencia ta bisa ku el a haña hopi opstrukshon durante di e tempu ku e tabata gezaghebber. Su koleganan den bestuurscollege i espesialmente den e koalishon di gobièrnu tabata yam’é inkolegial. I muchu krítiko. El a pasa den momentonan difísil. “E ora ei mi tabata sinti e preshon di mi koleganan den gobièrnu, ku no tabata ke pa mi tuma sierto desishon. Di otro banda mi tabata sa ku konformé lei, mi konsenshi i reglanan di bon gobernashon, mi mester a tuma e desishon ei.”
Emerencia a duna e idea di integridat forma na Boneiru i a trata di pas’é den su trabou tambe i den relashon ku su koleganan. Integridat ta su aspirashon. “Bo mester bai pa interes general. Eksepshon mester konfirmá regla; eksepshon no mester bira regla. Mi ta hopi krítiko den asuntunan asina. Kisas mi ta muchu krítiko den término manera nan a kustumá aki, pero no den relashon ku responsabilidat di gobièrnu di Boneiru.”
Kòrta sinta
Mal komprondementu i ignoransha di e funshon di gezaghebber a hunga un ròl grandi. “Un hende a yega di bisa mi: gezaghebber ta sinta so e tin di kòrta. Mayoria di mandatario parse ta kere ku ta presidensia di bestuurscollege i konseho insular ta e tarea prinsipal di un gezaghebber. No ta realisá ku ademas di ta funshonario, gezaghebber ta un órgano di gobièrnu di un persona ku tarea independiente. Esaki a kousa hopi situashon di bruamentu i frikshon. Si no bini e realisashon kiko e funshon di gezaghebber ta enserá, tur gezaghebber lo haña nan ku problema.”
Outor: Belkis Osepa