No a kumpli ku tur speransa ku a krea ku renobashon estatal – potrèt: Belkis Osepa
UTRECHT – E Kolegio pa derecho Humano ke mas atenshon pa derecho humano na Hulanda Karibense. Esaki a sali for di un konseho di e Kolegio aki tokante e evaluashon di struktura estatal di Boneiru, Saba i Sint Eustatius.
E kolegio ta hasi algun rekomendashon na ministerio di Asuntunan Interior i Relashonnan den Reino, e Kuerponan Públiko, e Representante di Reino i Tweede i Eerste Kamer. Den e rekomendashonnan e Kolegio entre otro ta konsehá pa ‘garantisá e nivel mínimo di e derechonan den tratadonan di derecho humano i pa aspirá pa implementashon kompleto di esaki’.
Gobièrno hulandes mester bini ku motivashon fundá ora ku e reglanan den Hulanda Karibense ta diferente for di e parti oropeo, e Kolegio ta skibi. Mester investigá tambe e impakto di e efektonan riba e poblashon.
Regulashon
E Kolegio ke pa den e evaluashon investigá e motibunan pa regulashon pa Hulanda Karibense. Mester mira bon si a mantené e prinsipio di igualdat ora a introdusí lei nobo. Esaki ke men ku por tin diferensha den regulashon solamente si e situashonnan na Hulanda Karibense i Hulanda Oropeo ta asina esensialmente diferente ku ophetivamente mirá por hasi un distinshon. E Kolegio ta konstatá ku a bini regulashon riba hopi tereno, miéntras ku a primintí di mantené reserva. E islanan ta eksperienshá esaki komo arbitrario i esaki ta kousa falta di komprenshon, e Kolegio ta skibi.
Nivel di bida
E nivel di bida aktual riba e islanan ta prekupá e Kolegio: ‘E habitantenan di Hulanda Karibense ta súpdito di Hulanda i tin mesun derecho riba un nivel di bida drechi ku hulandesnan ku ta biba na Hulanda oropeo.’ Ku esaki e Kolegio no ta bisa ku e nivel di bida mester bira eksaktamente meskos, pero e ta señalá e pobresa grandi riba e islanan si. ‘Hulanda mester tuma medida adekuá pa sigurá realisashon di e derecho aki’, tin pará den e konseho.
Derecho penal
Un terser punto ku e Kolegio ta menta ta den e área di derecho penal. E kantidat di detenido na Hulanda Karibense ta relativamente haltu. Hulanda Karibense ta pará riba number dos di lista mundial ku 700 detenido pa kada 100 mil habitante, asina e Kolegio ta bisa. Ademas mester invertí den entre otro medidanan preventivo, kastigu alternativo, regulashon di TBS, derecho penal hubenil i garantia di derecho di prezu.
Outor: Jamila Baaziz