Wardakosta ta kontrolá de bes en kuando so – potrèt: Watdakosta
WILLEMSTAD – “Tur ku tin e boto a ranka pasa pegá pegá ku kabes di algun landadó na Cas Abou”, un bishitante spantá ta konta. El a yama wardakosta mésora pa denunsiá esaki pero nan a bis’é ku ta e mes mester papia ku e kapitan.
“Nos mes mester t’ei banda, sino ta djis un relato di un hende ku a mira algu”, Cynthia de Veere, hurista na Wardakosta, ta konta. Solamente si drente denunsio frekuente di un sierto área, ta manda patruya.
Na Kòrsou a sosodé mas be ku boto ta pasa riba landadó i snòrkeldó i poko tempu ei atrobe un snorkeldó a haña herida di chapaleta di un boto. Hopi be ta difísil pa determiná ta ken tin falta.
Kondukta di nabegashon
“Boto mester mantené un distansha di 50 meter di snòrkeldó i adaptá nan manera di nabegá den un área kaminda bo por fèrwagt ku tin hende ta landa”, De Veere ta konta. Kon ta hasi indiká un área asina ta keda vago. “Hopi be ta marka e área ku un bui of tin un bòrchi. Además ta asumí ku den área di landadó e awa ta blou kla i boto mester keda den e área di awa blou skur.
Selwyn Ignacio kasi tur siman ta kore ku su boto den bénewater i hopi be ta mira kos peligroso sosodé. “Tin kaminda algun meter for di kosta ya kaba e awa ta hundu, esta blou skur. Landadó no ta realisá esaki pasobra ta serka di kosta. Boto tampoko no ta paga tinu na e koló di e awa i ta ranka pasa serka kantu di kosta. Espesialmente pa hende ku no tin kustumber di nabegá aki e reglanan no ta masha kla. Tambe ta difísil pa atrapá e hendenan aki. Wardakosta mester pasa nèt na e momentu ku nan hasi malu.”
Pa vigilá boto i ripará infrakshon eventual, Wardakosta ta patruyá. Pero Inspekshon di Haf tin e tarea ofishal di vigilá den bénewater di Kòrsou. E vigilansha aki ta masha limitá, e inspekshon tin un boto so.
‘Muchu poko kòntròl’
“Nos ta traha huntu ku wardakosta”, asina inspektor di seguridat di haf Russel Henriquez ta bisa. “Nos mes ta kontrolá, pero un boto so no ta sufusiente pa mantené e vigilashon na drechi. Sin Wardakosta nos lo no por logra. Hopi be mi ta haña tep di Wardakosta i tin be mi ta yega pa mi traha prosès verbal. Ministerio Públiko ta despachá esaki.”
Henriquez ta kontentu ku e koperashon aki, pero e ta haña ku e maneho por ta mas mihó. “Bon mirá un boto so no ta sufisiente pa inspekshon di Haf, mester tin mas kòntrol riba bénewater. Ainda tin muchu aksidente ta sosodé i e úniko manera pa kombatí esaki ta mas outoridat visibel riba awa: ke men mas patruya.”
Mester di mas testigu
Un tep di un baidó di playa na Cas Abou segun Henriquez no ta sufisiente pa traha un prosès verbal. “Si bo kuminsá un kaso, un testigu ta meskos ku niun testigu. Mester tin por lo ménos dos òf tres hende ku ke testiguá i mayoria di hende no tin masha gana di hasi esaki. Hende tin miedu pasobra e isla ta chikí.”
Outor: Elisa Koek