Ramonsito Booi, Burney i Ginia El Hage na korte – potrèt: Belkis Osepa
KRALENDIJK – Korte Komun di Hustisia riba 21 di mart ta sentensiá e apelashon antisipá di Ministerio Públiko (OM) kontra e desishon hudisial pa no hiba e kehonan di korupshon atministrativo den e kaso Zambezi.
Ramonsito Booi i e pareha Burney i Ginia El Hage 7 di mart atrobe a parse dilanti korte na Kòrsou kaminda a trata e apelashon antisipá. Tantu abogado Geert-Jan Knoops komo El Hage i Booi a kuestioná durante tratamentu di e kaso e maneho di Ministerio Públiko pa manda informe pa prensa ku por influensha pueblo i testigunan. El Hage durante su último palabranan den korte a baha pisá riba Ministerio Públiko.
Belkis Osepa papia ku Burney El Hage
Pèrsiguishon
El Hage a enfatisá si ku e no ta kuestioná e aktividatnan interno di Ministerio Públiko, ku ta monopolio dje instituto. “Mi ta papia di e maneho kaminda no por ta posibel ku den Reino Hulandes un grupo polítiko ta bisa bai pèrsiguí un otro grupo politiko i Ministerio Públiko ta sali bai pèrsigui. Ministerio Públiko mester hiba un maneho abase di reglanan ophetivo, basá riba análisis kon mandatarionan en general ta komportá nan mes.”
Abogado general Ton van der Schans ku a representá prokurador general durante e seshon a argumentá ku awor ta e momentu pa apelá. Mirando hurisprudensia hulandes no por warda te na kabamentu di e tratamentu di kontenido di e kaso penal.
Ròl
OM a refutá e desishon di Korte di Promé Instansha di aña pasá, pa no hiba e denunsianan di korupshon, pasobra esakinan no ta kai den e límitenan di e investigashon hudisial kontra Ramonsito Booi i Burney El Hage. E echonan di korupshon mester hunga un ròl den e kaso penal di 24 i 25 di mart, OM ta haña.
Van der Schans: “E echonan di korupshon ta den kuadro di e investigashon di e fail di Sunset Beach Hotel (Booi red.) i e fail Woning El Hage. Korte a duna OM espasio pa sigui pèrsiguí. E enkargo tabata amplio i ta p’esei mes nos por pèrsiguí e denunsianan di korupshon.”
Bataya
Abogado Geert-Jan Knoops a kritiká e palabranan di Van der Schans ku e tratamentu di e apelashon antisipá ta un ‘bataya hurídiko’. El a ekspresá su prekupashon tokante e echo ku un dia promé ku e apelashon antisipá, OM a manda un komunikado di prensa pa medionan di komunikashon. Knoops no ta deskartá ku e notisianan di OM por influenshá testigu ku mester testiguá ainda den e kaso Zambezi. “Esaki por okashoná daño severo na nos klientenan. Mi ta haña e palabranan aki sumamente stigmatisante. Asina hendenan na kas lo kere ku nos klientenan tin algu di skonde. Na Hulanda un kos asina sigur lo a resultá den un investigashon di e manera públiko ku OM ta influenshá medionan di komunikashon.”
Spekulashon
Despues Van der Schans a bisa ku OM ke djis evitá ku tin spekulashon den e kaso Zambezi ku ta haña hopi atenshon di prensa. “Si nos no bisa nada esei ke men ku tin spekulashon i rumor strabagante ta kore. Pa duna informashon nos mes, ta mihó ku laga e diskushon kontinuá.
Knoops a referí na pronunsiashon di diferente profesor i hurisprudensia hulandes pa aklará na Korte i OM ku e apelashon antisipá kontra di un prosès verbal di un seshon pro forma no ta posibel. Tambe Knoops ta bisa ku OM no mester tin miedu ku nan no por apelá mas kontra skrapmentu di e denunsianan di korupshon.
Outor: Belkis Osepa