George Croes na palabra cu ministernan banda di dje – foto: Ariën Rasmijn
ORANJESTAD – Awor cu Aruba ta cumpli porfin cu recomendacionnan di Financial Action Taskforce (FATF) ariba tereno di combatimento di labamento di placa y financiamento di terorismo, mester implementa leynan. Esaki hefe di Departamento Huridico (DWJZ) George Croes a declara ayera durante un conferencia di prensa.
Croes a haci e declaracion aki den presencia di prome minister Mike Eman, ministernan Yrausquin, Dowers y De Meza y representatenan di Banco Central, MOT y Ministerio Publico. Motibo di conferencia di prensa aki tabata pa duna un splicacion ariba hecho cu FATF no ta considera Aruba mas como un pais cu no ta cumpli cu su recomendacionnan.
‘Follow-up’
Na 2009, FATF a haci un evaluacion hopi profundo di sistema financiero di Aruba pa loke ta combatimento di labamento di placa y financiamento di terorismo. A constata cu Aruba no tabata cumpli cu un serie di rekisitonan clave pa loke ta legislacion contra labamento di placa, identificacion pa servicionan financiero, obligacion pa declara transaccionnan inusuario, tareanan di supervision di Banco Central y cooperacion cu instancianan internacional.
“Tabata un proceso di cuater aña den cual leynan nobo a ser introduci. Tabatin intercambio y raportahe continuo cu FATF y aña pasa e progreso cu Aruba a haci tabata asina bon segun FATF cu nan a propone pa den e reunion plenario di februari cu a pasa Aruba wordo kita for di e proceso di ‘follow-up’”, asina Croes a splica. Proceso di ‘follow-up’ aki tabata encera cu despues di aprobacion di rapport ta indica y aplica medidanan pa asina drecha puntonan negativo cu a sali den rapport.
Awo falta implementacion
Hefe di DWJZ a indica cu FATF tambe a duna recomendacionnan pa asuntonan cu mester mehora ainda. Ultimo evaluacion tabatin hopi enfoce ariba implementacion efectivo di e leynan nobo cu a wordo introduci. “Bo por tin leynan masha bunita, pero e leynan mester wordo aplica y bo mester mustra resultado cu e leynan ta efectivo”, segun Croes. Den proximo evalucion, cu por cierto ta andando caba, Aruba lo mester duna prueba statistico cu leynan nobo ta wordo implementa efectivamente.
Menos ley, mas responsabilidad propio
Loke falta ainda na legislacion ta un ley nobo cu lo supervisa casinonan ariba e isla. Ademas mester drecha legislacion ariba tiponan di compania manera NV, VBA y AVV. No ta trata di proyectonan chikito, aunke FATF no ta duna hopi peso na nan den su rating. Croes ta bisa cu gobierno di Aruba ta buscando experticio di afo pa por traha legislacion nobo aki. Croes ta bisa cu enfoke lo bay wordo poni tambe den ‘risk assessment’, of calculacion di riesgo serca clientenan potencial di dunadornan di servicio financiero. Banconan lo mester balota pa nan mes si un cliente of un circumstancia ta sigur of no pa por duna servicio. “Basicamente menos ley y mas responsabilidad propio pa instancianan financiero y no-financiero.”
Sondeo
Grupo strategico, consistiendo di tur partidonan envolvi na Aruba y cu prome minister na cabes, a sondea riesgonan pa loke ta labamento di placa y financiamento di terorismo. Diferente gruponan awo ta cuantificando e riesgonan cu a wordo identifica den sondeo aki. Pa proximo evaluacion extenso cu FATF ta bay haci na 2019, lo bay tin reglanan nobo cu Aruba lo mester bay cumpli cune. Esaki nan ta concerni combatimento di trafico y mal uzo di armanan di destruccion masal (WMD).
Autor: Ariën Rasmijn