André Bosman (potrèt di archivo) – potrèt: Jamila Baaziz
WILLEMSTAD – Djarason dia 12 di mart lo tin un debate den Tweede kamer na Hulanda pa aseptá e ‘lei di Bosman’. Si e lei aki pasa esaki lo tin konsekuensha grandi pa Arubano i yu di Kòrsou i di Sint Maarten ku ke bai biba Hulanda.
E idea tras di e lei di inisiativa ku e parlamentario André Bosman (VVD) ta proponé ta pa tene hóben sin perspektiva ku ke bin biba Hulanda i ku ta bini di e paisnan karibense den Reino hulandes, esta Kòrsou, Sint Maarten i Aruba, afó.
Básikamente e lei di Bosman ta bisa ku si un Arubano òf un yu di Kòrsou òf di Sint Maarten ke bai biba na Hulanda pa mas ku seis luna e mester kumpli ku un di e kuater siguiente kondishonnan: e mester tin trabou òf un propio empresa na Hulanda, sufiente moda pa su propio mantenshon, sigui un edukashon rekonosé na Hulanda i e mester forma parti di un famia di un hulandes oropeo.
Bosman: “Si nos wak e antianonan ku bini aki sin por kumpli ku e kondishonnan menshoná, despues di tempu nos ta bin topa nan bèk riba e listanan di kriminal i di hende ku a keda sin kaba skol. Ya kaba nos tin 20 pa 30 aña ta lucha ku e problema aki. Mi no ke sigui traha trabou di pia di palu. Ya Hulanda tin su mannan yen pa yuda esnan ku a kai den problema kaba.”
Resistensia
Tin hopi resistensia kontra e lei, no solamente na e islanan konserní sino tambe bou di antiano bibá na Hulanda. E organisashon OcaN a apelá na tur antiano na Hulanda pa bini e reunion di Tweede Kamer. Presidente di OcaN Glenn Helberg: “Mi ke tende kiko e parlamentarionan hulandes tin di bisa tokante e proposishon aki, pasobra trahamentu di un areglo di establesementu ta forma parti di e akuerdo di gobernashon. Mi ke tende kon esaki ta posibel miéntras ku tur sorto di eksperto ta bisa ku e proposishon di lei aki ta kontra di direktivanan internashonal.”
Helberg ta referí entre otro na e komishon independiente Meijers, ku a bisa den un anotashon na Tweede Kamer ku e lei di Bosman ta bai kontra sinku tratado internashonal i dos direktiva di Union Oropeo. “E areglo proponé tokante establesementu i sakamentu di hulandes di desendensia antiano ta bai kontra di e debernan di tratado i derecho primario di Union. Niun otro miembro di Union Oropeo ku ántes tabatin kolonia pafó di Oropa, no konosé un partimentu asina di nan propio siudadanonan”, segun komishon Meijers.
Despues di e debate den Tweede Kamer, inisiadó Bosman lo prosesá tur informashon, pregunta i remarke ku tabatin i adaptá e proposishon di lei di un manera ku e por haña un mayoria den Tweede Kamer ku ta pro e proposishon. Si despues di vota atrobe e proposishon haña mayoria e ta pasa pa Eerste Kamer i si nan tambe aprobá e lei ta un echo. Si votonan kontra di e lei ta den mayoria por lo pronto nada lo no kambia.
Outor Rita van der Heul