Ta kita 450 drèmpel riba henter Kòrsou – potrèt: Ministerio di VVRO
WILLEMSTAD – “E kaminda pa Blue Bay a bira un karetera di pusta for di dia ku a kita e drèmpelnan”, Ilona Janga di Fundashon pa Mucha ku Outismo (Stichting voor Kinderen met Autisme) ta bisa. “Ántes nos por a bin hasi kompra ku e muchanan na e toko aki den kaya, pero aworaki ta kasi imposibel.”
Ta kita 450 drèmpel ku a kaba di pone dos aña pasá. Segun minister di Tráfiko, Transporte i Planifikashon Urbano (VVRP) Earl Balborda, e gobièrnu aktual a konstatá ku a pone muchu hopi drèmpel sin un plan kla. Èks minister di VVRP Charles Cooper no ta di akuerdo: “Pa kasi tur drèmpel tabatin un masha bon motibu.”
Elisa Koek ta papia ku Charles Cooper
“No tabatin klaridat ni maneho ora a pone e drèmpelnan”, Balborda ta kontinuá. Fundashon Ofisina di Akountent di Gobièrnu (Stichting Overheids Accountants Bureau SOAB) a investigá e situashon i a disidí di kita un sierto kantidat di drèmpel. “Pa kita e drèmpelnan ta kosta 40 mil florin, pero segun Balborda esaki tabata den presupuesto kaba. “Ta aprobá so mester a aprobá e plan ainda.”
Despues ku a pone e drèmpelnan nobo di rùber, masha hopi keho tabata drenta na e ministerio. Tambe siudadanonan mes tabata kita e drèmpelnan for di kaya. “Riba kaminda grandi e drèmpelnan tabata okashoná stankamentu di tráfiko i esaki nos ke para”, Balborda ta bisa. “Espesialmente kaminda tabatin e keho aki kita e drèmpelnan. Awor ta pone e drèmpelnan riba kamindanan chikí. Banda di skol sí a laga e drèmpelnan keda.”
Motibu pa drèmpel
Èks minister Charles Cooper ta suponé ku den Servisio pa Obra Públiko (antes DOW) tabatin diferente vishon riba e maneho di drèmpel. Esaki a krea inklaridat. “Tabatin dos grupo i mi ta kere ku e hefe di DOW a bai ku esun grupo i ku sobrá no tabata di akuerdo ku esaki. Minister Balbòrda a tende rumor tokante korupshon i a kuminsá kita drèmpel.”
A pone mayoria di e drèmpelnan ora ku Cooper tabata minister i ainda e ta di akuerdo ku e manera ku esaki a sosodé. “Komo minister bo no ta disidí unda ta pone drèmpel anto kuantu”, asina e ta reakshoná riba e remarke ku a pone e drèmpelnan sin maneho i sin plan. Ta DOW i polis ta ehekutá e maneho pero bo tin responsabilidat final si. Tin be mi tabata puntra pakiko un sierto drèmpel t’ei i semper tabata duna mi un bon motibu.”
Sin studia sin pensa
Di su parti Cooper ta haña e kitamentu di e drèmpelnan tin be ta sosodé deskabeyá i ta krea situashonnan peligroso. Wak e skolnan na Koral Specht òf e vèlt di deporte di Suvek. Tambe banda di Breezes Hotel a kita drèmpel: esakinan tabata einan espesialmente pa laga turista drenta òf sali e hotel mas trankil posibel. Asina tin yen di ehèmpel. Awor ta kita drèmpel sin studia sin pensa. Si algu sosodé pa motibu di e situashon peligroso aki, ta minister ta responsabel.”
Pidi drèmpel bèk
Entretantu Janga a entregá un petishon pa pone un drèmpel bèk den e kaya di su fundashon. “M’a skibi un karta na februari i mi ta spera di tende algu pronto.” Otro hende ku ke un drèmpel (bèk) por entregá nan petishon serka minister Balborda òf DOW.
Outor: Elisa Koek