André Bosman – potrèt: Suzanne Koelega
DEN HAAG – Mester adaptá e eksigenshanan pa establesementu ku lei di Bosman ke pone pa antiano ku ke bin biba Hulanda. Awe a deliberá krítikamente tokante e proposishon di lei di André Bosman (VVD) den Tweede Kamer.
Mester kambia e lei di inisiativa riba algun punto pa e haña sufisiente konsentimentu. Bosman ta bai prosesá tur remarke ku a hasi awe i lo bini ku un reakshon i un nota di kambio. Despues lo bolbe deliberá riba e lei den Tweede Kamer. Ainda no tin un fecha p’esaki.
Durante di e debate Tweede Kamer ta opviamente dividí tokante e proposishon di lei. Tur partido ta bisa ku nan ke solushoná e problema di antiano ku poko perspektiva na Hulanda, pero pa D66, ChristenUnie, SP i GroenLinks no mester hasi esaki ku e proposishon di lei aki. Nan tin hopi krítika i ta mustra riba e speshalistanan ku a bisa ku e lei ta konfliktivo ku tratado internashonal i ta diskriminá. Linda Voortman (GroenLinks): Nos tur ta igual, pero aparentemente tin di nos ta ménos igual ku otro.”
PvdA
Partner di koalishon PvdA ta hañ’é den un kompromiso durante di e debate. Den e akuerdo di gobernashon nan a bai di akuerdo ku un areglo di establesementu, pero e lei di Bosman ta kontené elemento ku e partido no por sostené. Roelof van Laar ta bisa ku apsolutamente nan no ke e distinshon a base di lugá di nasementu den e proposishon. Na lugá di esei e ke pa wak na unda un hende ta biba. “Hurídikamente esaki ta kompliká si, pasobra kon bo ta determiná si un hende ta habitante di un isla? Kon largu e mester a biba einan antó?”
Ademas PvdA ke pa e lei konta solamente pa antiano ku poko perspektiva, ke men no pa tur hende. E ta proponé pa duna un ‘deklarashon di inaplikabilidat’ na tur hende ku bai studia of ku ta bin traha na Hulanda.
CDA ta bisa ku ta un lei ‘doloroso’, pero ta aseptá ku mester trata e problema di hóben sin muchu futuro. Madeleine van Toorenburg ta referí na su propio eksperiensha ku e hóbennan aki i ta boga pa gobièrnu hulandes studia e posibilidatnan pa tene antiano ku poko perspektiva afó.
VVD, PVV i SGP ku eksepshon di algun remarke chikí ta di akuerdo ku e proposishon di lei.
Outor: Jamila Baaziz