Ougùstùs 2012: Dean Rozier ta sali for di MFK i no ta sostené gobièrnu Schotte mas – potrèt: Dick Drayer
WILLEMSTAD – Ministerio Públiko ta investigá e asuntu di soborno rondó di e èks presidente di frakshon di MFK Dean Rozier. Esaki a sali for di un anotashon ku a lèk di Ministerio Públiko (OM).
Na ougùstùs 2012 Rozier lo a ofresé plaka na su ko-miembronan di Staten Pik Pisas i Monique Koeyers-Felida pa pone e gabinete Schotte kai. Pisas a hasi denunsio di esaki. El a bisa ku despues e no a tende nada nunka mas di OM.
Djei Pisas a kuminsá un prosedura di artíkulo 15 pa fòrsa OM di hasi un investigashon di e asuntu. Durante di tratamentu di e kaso aki tras di porta será a bin sali ku ainda e investigashon di Rozier ta kore.
For di e anotashon di OM por saka ku a kuminsá e investigashon e dia despues di e denunsio riba 7 di ougùstùs. Tantu e dos parlamentarionan di MFK i e presidente di partido di MFK Rudney Games durante e prome interogashon a deklará ku Dean Rozier via kombersashon na telefon i via Blackberry Messenger a invitá e tres personanan aki pa pasa na kas di e presidente di frakshon. Einan Rozier lo a ofresé 500 mil florin pa nan retirá nan sosten na gobièrnu Schotte.
Prokurador general Dick Piar ku motibu di e interogashonnan a duna orden pa hasi un investigashon penal, pero pa motibunan táktiko e no a haña ku ta oportuno pa e momento ei detené Rozier i pa listra kas.
Na novèmber di 2013 OM a pidi outoridatnan kanades pa segurá e mensahenan ku a manda via Blackberry messenger i entregá nan na Hustisia na Kòrsou. Te awe no a haña kontesta riba esaki. Luna pasá OM atrobe a manda un petishon pa asistensia hurídiko pa outoridatnan na Canada.
Ministerio Públiko awor ta bisa ku nan ta dependiente di outoridatnan kanades. A base di e resultadonan di e petishon pa asistensia hurídiko lo tuma e pasonan ku ta sigui. P’esei no por bisa ku Ministerio Públiko lo no pèrsiguí, segun OM.
Outor: Dick Drayer