Vanessa Williams na palabra – foto: Ariën Rasmijn
ORANJESTAD – Stichting Bevolkingsonderzoek Borstkanker Aruba (BOB) kier haci screening regular di pecho di hende muher na Aruba entre e edad di 45 – 75 aña. Idea ta pa asina por yega na diagnosisnan mas trempan di cancer di pecho y asina duna esnan cu e diagnosis aki mas chens pa sobrevivi e malesa y haya tratamento menos invasivo.
Vanessa Williams di Fundacion BOB na palabra
E fundacion nobo aki ta di opinion cu den hopi caso patientnan a haya nan mes cu complicacion pasobra a diagnostica e tumor den nan pecho hopi laat. Segun cifranan di investigacion haci hunto cu Departamenta di Salubridad Publico, cancer ta forma 25 porciento di mortalidad na Aruba y cancer di pecho ta forma mas cu 10 porciento eyden. Den Caribe percentahenan aki ta cuadra cu averahe di region, pero compara cu Hulanda Aruba tin mas patient di cancer.
Cancer di cuero ta e cancer mas frequente bou hende muhe y homber, pero bou hende muher cancer di pecho ta sali numer dos, y segun ultimo cifra e cantidad ainda ta crece. Tur aña tin un averahe di 80 hende muher cu ta haya e diagnosis di cancer di pecho. Mayoria ta entre 45 y 80 aña, pero e grupo cu tin mas o menos 40, tambe ta creciendo.Aña pasa fundacion BOB a logra cumpra un aparato pa saca mamografia via recaudacion di fondo.
Pero ainda falta placa, entre otro pa promocion y specialista necesario pa opera e aparato. Cu e aparato nan kier haci un chekeo dentro dos aña di 20.000 hende muhe. Pa logra a lo menos 10.000 hende muher den un aña e fundacion mester concientisa e hende muher prome. Pasobra tin hopi cu no sa kico ta un mamografia of nan tin miedo di e resultado.
Autor: Ariën Rasmijn