Dòkter Michael Hermelijn – potrèt: Belkis Osepa
KRALENDIJK – E kantidat di pashènt na Boneiru a krese asina tantu ku mester di mas ku ocho dòkter di kas. Minister Edith Schippers di Salubridat Públiko, Bienestar i Deporte (VWS) ta risibí un apelashon urgente di dòkter Michael Hermelijn pa studia e maneho di dòkter di kas riba e isla intensivamente.
Burokrasia rònt di kontrakto di kuido, inklaridat tokante dispensashon pa dòkter suplente, e echo ku tin òf ta laga di tin un registrashon di BIG pa médiko i atrakshon di médiko oropeo a trese malkontentu den mundo médiko na Boneiru í seka pueblo bonerianu tambe.
Kòntrakt di kuido
Tur dia e salanan di espera ta yena. Dòkternan di kas tin asina tantu pashènt ku nan no por garantisá medesina responsabel mas, asina Hermelijn ta bisa. E tin masha gana traha ofishalmente komo dòkter di kas, pero e no ta haña un kòntrakt di kuido di e Ofisina di Seguro Médiko (ZVK), ku ta kordiná kuido riba e islanan BES.
Dòkter Hermelijn ta popular seka su pashèntnan – potrèt: Belkis Osepa.
Sigur 60 pashènt i simpatisante di Hermelijn a bòncha den e sala di espera di su práktika di dòkter di kas. Nan ke sostené e dòkter durante di e rueda di prensa ku a konvoká. Despues e simpatisantenan a kana bai ofisina di ZVK komo protesta. Na 2011 kaba 4 mil hende a firma durante un akshon di firma pa sostené Hermelijn.
Kama
Dòkter Hermelijn ta popular seka su pashèntnan. E ta tuma su tempu pa nan, e ta papia papiamentu i e konosé e kultura. “Mi por yama mi dòkter mei anochi lant’é fo’i kama, e ta bini”, un pashènt ta bisa. “Prome ku 10-10-10 e tabata traha komo dòkter di kas, pakiko awor nò?”
Hermelijn ta traha sí komo dòkter di kas suplente i komo direktor di e Huisartsenpost na Boneiru. E no tin mag di traha mas den su propio práktika i pa traha komo dòkter suplente fiho banda di un dòkter di kas establesé e mester pidi dispensashon. Miéntras ku esaki no ta nesesario pa un dòkter di kas ku promé ku 10-10-10 tabata establesé riba e islanan BES. Hermelijn: “Ta ami ta e úniko ku mester di dispensashon, sobrá nò.”
Hermelijn ta diskutí tambe ku dòkternan oropeo si ta bin traha na Boneiru ku un dispensashon di VWS. El a haña un edakashon komo médiko básiko, pero e no a sigui e estudio di dòkter di kas. For di 10-10-10 e estudio aki ta mandatorio pa dòkter di kas ku establesé na islanan BES. Segun Hermelijn e punto aki no ta hunga un ròl p’e pasobra e tin anotashon médiko pa por traha komo dòkter di kas. Ademas tin mas mediko básiko ku ta traha komo dòkter di kas na Boneiru.
Abogado Eugene Abdul ta yuda Hermelijn hurídikamente. “No por t’asina ku bo ta dòkter di kas promé ku 10-10-10 anto awor di repente ta kita e derecho ku bo tabatin pa asina bo no por traha na Boneiru.”
Registrashon BIG
No ta tokante poseshon di dispensashon so tin inklaridat. Tres dòkter di kas na Boneiru so tin un registrashon di BIG. “Ami ta un di nan.” E registrashon ta duna klaridat tokante e kompetensha di un dunadó di kuido. Hermelijn: “Ta Hulanda su deber pa garantisá kuido médiko di e bonerianu.”
Awe ZVK ta bai sinta rònt di mesa atrobe ku Hermelijn, direktor Nico de Jong ta bisa. “Si e bisa ku e no tin mester di e dispensashon, e mester mustra papel ku ta prueba esaki. Ta e ora ei numa ZVK por wak si e ta bini na remarke pa un kòntrakt di kuido.”
Diputado Hans Elst ku ta na enkargo di kuido di salubridat personalmente a bin buska drechi na e práktika di Hermelijn. Els ta boga pa oumentá e kalidat di trahadónan médiko. “Ta e inigualdat di kalidat ta un opstákulo. Hermelijn tin un registrashon BIG i esei ta un norma ku nos mester mantené pa keda ku kalidat di kuido médiko pa pueblo.”
Outor: Belkis Osepa