Minister Nelson Navarro
WILLEMSTAD – Tres morto den sinku dia, sinku den dos siman i un total di nuebe morto e aña aki. “E situashon na Kòrsou ta alarmante. Mi tabatin kontakto kaba ku minister di Hustisia na Hulanda, mi ta haña sosten kompleto di mi koleganan den Reino.”
Asina minister Nelson Navarro di Hustisia ta bisa. Tur wowo ta riba dje awor ku asesinatonan ta sigui un tras di otro. “Ta un fuente di prekupashon i iritashon ku kos por a yega asina leu den nos komunidat”, segun Navarro. Den e último tres asesinatonan probablemente ta trata di likidashon. “Ta posibel ku ta trata di un dil di droga ku a bai malu.”
Ayera a haña e kurpanan sin bida di Shendrick Emanuel Randt di 17 aña i di Nikita Catharina Attaf di 23 aña. Tur dos a haña tiru den kabes. Awe nochi e deejay di Radio Mas Renzo Soleano a fayesé den hòspital despues ku a tir’é na su kas.
Keach Chang, presidente di Curaçao Security Association (CSA), ta kere ku ta kriminalidat organisá. E no ta spanta di e ola di likidashon aki. “Mientras tantu ku nan ta hunga den nan mes kurá patras i tene nan mes sirkuito limpi, e siudadano normal lo no ripará nada. Esaki no tin nada di hasi ku atrako i kiebro i lo no mester ta relatá tampoko na e sintimentu di seguridat.”
Sintimentu di inseguridat
I tòg komunidat kurasoleño no ta sinti nan mes kompletamente seif. Awe nochi un grupo di siudadano prekupá a tene un manifestashon na Plasa Brion. Chang ta ripará si ku den kriminalidat ‘normal’ e atrakadónan ta mas i mas mihó organisá i ta tuma nan tempu pa analisá nan víktimanan delantá.
Ainda no ta trata di gang organisá ku ta kometé atrako i kiebro, e ta bisa, i CSA ke uni tur kompania di seguridat i interkambiá informashon, pa asina kombatí ku tin gang organisá. Entretantu nan ta aktivo den seis área públiko ku kámara di seguridat, kaminda e kompanianan ta interkambiá informashon tambe.
Arma ilegal
Entre tantu e minister ta trahando riba un plan di enfoke pa baha e kantidat di arma ilegal na Kòrsou mas pronto posibel. “Ministerio Públiko, Tim di Koperashon di Reshèrshi,Wardakosta i Kuerpo diPolis di Kòrsou a analisá di unda e armanan ta bini i unda nan ta drenta Kòrsou. Awor mester konfiská e armanan, i pa esei ta trahando un plan di enfoke.”
Ademas polis ta den estado alertá, pasobra ta ferwagt ku tin un likidashon nobo na kaminda. “Ta un echo ku e sirkuito kriminal no ta tene kuenta ku edat. Si nan ke duna un señal nan no tin kunes ku ta trata di hóben menor di edat. Esaki lo resultá den reperkushon pasobra si ta trata di un likidashon e otro banda tambe ta kuminsá. Polis ta masha okupá ku buskamentu pa haña sa ta ken ta tras di e asuntu pa por detené esnan kulpabel mas pronto posibel.”
Deskuido di hubentut
“Loke nos ta pasando aden aworaki ta e resultado di tur e añanan ku a deskuidá nos hubentut”, Navarro ta bisa. “Nos hubentut ta kere ku den e sirkuito kriminal nan por gana plaka lihé. Ta trata di glamur, di artíkulo luho, di biramentu riku mas lihé posibel i kisas di aventura tambe. Pero ta un aventura di peliger mortal. Si bo tira un dil di droga ku bai malu, bo por konta ku ta sigui un likidashon.”
Outor: Anneke Polak