Saku ku material ku parse greis di limpia kuné | Potrèt: Michelle da Costa Gomez
WILLEMSTAD – E área di naturalesa pegá ku e parti wèst di e terminal di zeta na Bullenbaai, a kambia den un tiramentu di sushi ilegal di sushi kímiko, produkto derivá di zeta i sushi di konstrukshon. Tambe tin papel i dokumento ku tin di haber direktamente ku trabou di Isla, kende ta hür e deposito di zeta Curaçao Oil Terminal (COT) ku PdVSA.
E área sushi no ta pertenesé na e terenonan ku a asigná na COT pa eksplotashon. E tiramentu di sushi i sushamentu di e área no ta kubrí pa e pèrmit di molèster ku a duna PdVSA. Asina fuentenan na ministerio di Salubridat, Medio Ambiente i Naturalesa (GMN) ta konfirmá.
Hende ku tabata keiru ei banda poko tempu pasa a topa no solamente ku e tiramentu di sushi, sino tambe a deskubri un lago chikí di asfalt yená ku un supstansha manera zeta. E tereno ta keda pafó di e tranké di COT. A yen’é na diferente lugá ku sushi di konstrukshon i resto di aktividat industrial te na un altura di kasi 10 meter.
‘Boom’ hel ku e nòmber PdVSA riba nan sushá ku zeta | Potrèt: Michelle da Costa Gomez
Na diferente lugá tin e asina yamá ‘oil booms’, un tipo di saku grandi koló hel ku por tene zeta afó, ku ‘Refineria Isla Curazao’ imprimí riba nan. Nan ta di e mésun tipo ku a pone na boka di bahia di Jan Kok durante di e desaster di zeta na 2012. E tempu ei un parti grandi di e área di naturalesa ei a susha ku zeta.
Banda di seru di sushi atministrativo tambe tin yen di saku yená ku algu ku parse greis pa spùit kuné usá, un material ku ta usa pa limpia e tankinan di zeta pa kita restu di fèrf bieu i kapa di zeta. E sakunan ta den henter e área; nan ta gastá i e material ku tin aden ta plama den henter e área sin kòntròl.
Testigu ta bisa ku tin pikòp ta kore varios be pa dia bai bini di e tereno será di COT pa e luga di tira sushi klandestinamente i ta basha sushi ei.
Riba e mapa di satélité Google Maps por mira bon kla e sushamentu i e haltura di e sushi. Riba e mapanan tambe mesora por mira un mancha pretu den e paisahe. Esaki ta un tipo di lago di asfalt, yená ku derivado pretu di zeta. Rònt di e dam di tera di mas o ménos ocho meter a konstruí un muraya chikí di blòki pa wanta e porkeria ku ta lèk for di e baki improvisá. E likido diki pèkè pèkè den e lago di zeta a kousa morto di desena di yuana i para. No ta kla ta ki tipo di supstansha eksáktamente ta tira riba e lokashon aki.
Barí habrí ku sushi | Potrèt: Michelle da Costa Gomez
Entretantu GMN a tene un kòntròl onferwagt riba e tereno i a bishitá e lugá di tira sushi i e lago di asfalt. Ta trata aki di un área ku segun e Plan di Desaroyo Insular ta kai bou di e kategoria di ‘área di industria’, pero kaminda e tiramentu di sushi ta tuma lugá, ni Isla ni COT no tin nada di buska, asina ministerio di Salubridat, Medio Ambiente i Naturalesa ta konfirmá.
Outor: Michelle da Costa Gomez