Boneiru ta kana dilanti den e akshon ‘Doet’ den Karibe | Potrèt: Belkis Osepa
KRALENDIJK – Kòki Rugia Molina ta spera di haña bèrdura fresku denter di algun luna, bèrdura ku a krese den e kas di glas bèrdè di Fundashon Kuido pa Personanan Desabilitá (FKPD) na Rincon.
Trahadónan di e kompania di Awa i Elektrisidat WEB a pone man na obra pa renobá e kas di glas i instalá un sistema di irigashon profeshonal durante di e akshon grandi di boluntario Bon Doet. Boneiru ta kana dilanti den e organisashon di e akshon di mas grandi den Karibe kaminda organisashonnan sosial ta haña ayudo di boluntario.
Pa di kuater be plataforma NGO Boneiru huntu ku Oranjefonds ta organisá Bon Doet. E tema di e aña aki ta e responsabilidat sosial di kompanianan. Boluntario di 54 kompania ta partisipá riba 21 i 22 di mart.
Kushiná
Molina tin diesdos aña kaba ta traha na FKPD i seis aña kaba e ta kushiná einan tur dia. E ta spera ku nan propio kas di glas denter di algun luna lo produsí e bèrduranan di tur dia ku e tin mester. “Mi ta spera ku lo tin sèldu, promenton, siboyo i tambe spinazi, wármus i blachi di tayer.”
Ta positivo ku e klientenan di e akohida diario tambe lo okupá nan mes ku kresementu di fruta i bèrdura, Molina ta bisa. “De bes en kuando nan ta ferfelá nan mes. Awor nan ta bai krese mata i den futuro mi no tin nodi di kumpra bèrdura.
Será den ofisina
E boluntarionan di WEB ta traha ku masha entusiamo na e instalashon di e sistema di irigashon i ta aploudí e trabou di boluntario. “Ta agradabel pa ta mas serka di e hendenan. Sinta será den ofisina henter dia tampoko no t’e kos. Asina nos ta hasi bon pa nos propio isla”, un di e trahadónan di WEB ta bisa.
Outor: Belkis Osepa