E abogadonan ta deliberá kontinuashon di e kaso Zambezi – potrèt: Belkis Osepa

E abogadonan ta deliberá kontinuashon di e kaso Zambezi – potrèt: Belkis Osepa

KRALENDIJK – Fiskal Leomar Angela a pidi dies luna kastigu di sèl preliminar ku un temporada di prueba di tres aña i tambe 240 ora di servisio pa Burney El Hage i Ginia El Hage-Cicilia den tratamentu di e kaso Zambezi.

 
Den un rekisitorio ku a dura sigur dos ora Angela a argumentá e motibunan pakiko e pareha ta dilanti wes. Esaki ta relatá na finansamentu di konstrukshon di nan kas. Ta kulpa e pareha El Hage di falsifikashon di dokumento i tambe di labamentu di plaka relata na froude di hipotek.

 
Falsifikashon
“Nan no tabatin plaka i nan tabatin debe grandi”, segun Angela. Segun fiskal e parehá a estafá ku e oferta di konstrukshon i a falsifiká esaki. Tambe tin falsifikashon riba e dokumento di pidi fiansa i a adelantá shen mil florin antiano riba papel pa haña mas hipotek.

 
Angela: “A pidi e kontratista eksplisitamente pa inkluí e suma aki den e presupuesto di e konstrukshon. Nos no por bagatelisá i laga nan hasi ku nos manera kapitan a hasi ku bosman. E motibu ta den e parti di korupshon.” E kehonan di korupshon atministrativo no ta den e kontenido mas di e trato di e kaso Zambezi. Lo no pèrsiguí nan mas p’esaki.

 
Kompliká
Na fin di su rekisitorio Angela a argumentá ku e tamaño di e investigashon pa pèrsiguí e pareha El Hage i Ramoncito Booi tabata masha grandi i kompliká pa motibu di e echonan di korupshon. Ta p’esei a dura largu asina, segun Angela. “No ta un èksküs sino un realidat. No ta solamente falta di Ministerio Públiko (OM), pero tambe di e eskohonan ku defensá a hasi.” E ta indiká ku ta marga ku a keda solamente algun echo ku a sobra di e investigashon ménos e korupshon.

 
Defensa (abogadonan Knoops) a indiká ku nan tin mester di sigur tres ora pa e defensa. Wes Irma Lips a suspendé e kaso kontra e pareha El Hage te djárason. Si e kaso kontra Ramonsito Booi mañan kaba mas trempan, Knoops por tene su defensa di e pareha El Hage mas promé.

 
Kontratempu.
Awe meinta e kaso den korte a kuminsá ku kontratempu pa OM. Wes Irma Lips a rechasá e petishon di OM pa introdusí tres prosès verbal komo prueba durante di e trato. Abogado Geert-Jan Knoops a protestá i presentá hurisprudensia. “Ta un momento hopi malu pa trese un dokumento djis promé ku e tratamentu di kontenido”, segun Knoops. “Awor nos no a haña chèns pa konfrontá e dos direktornan ei ku na deklarashonnan.”

 
Wes Lips a disidí a base di hurisprudensia i planeamentu ku e ta ninga e pruebanan nobo. “E planeamentu t’ei kaba. A skucha e testigunan. E prome prosès verbal ta disponibel basta tempu kaba, pero OM a lubidá di bini kuné. Tabatin sufisiente tempu pa esaki. Den e stadio aki mi ta konsiderá esaki kontra di e prinsipio di òrden di proseso drechi.

 
Outor: Belkis Osepa